Zaburi 12 - Bibiliya Ijambo ry'imana D

Uhoraho agoboka abakandamijwe

¹ Zaburi y'umuyobozi w'abaririmbyi, iririmbwa hacurangwa inanga y'imirya umunani. Ni zaburi ya Dawidi.

² Uhoraho, tabara! Dore indahemuka zishizeho, abanyamurava na bo ntibakibaho.

³ Umuntu akinga mugenzi we ukuri, akamubwiza akarimi keza kuzuye uburyarya.

⁴ Uhoraho, tsemba abanyakarimi keza, uzibye abavugana ubwirasi.

⁵ Baravuga bati: “Tuzi kuvuga neza tuzatsinda, ni nde wahangara amagambo yacu ngo adutegeke?”

⁶ Uhoraho aragira ati: “Uhereye ubu ndahagurutse, ntabaye abanyamibabaro bakandamijwe, ntabaye n'abakene bafite amaganya. Nzabarinda ababasuzugura bakabacira mu maso.”

⁷ Ibyo Uhoraho avuga biratunganye, ni nk'ifeza yatunganyirijwe mu ruganda, ndetse yatunganyijwe incuro ndwi.

⁸ Uhoraho, wowe ubwawe uzabisohoza, uzadukiza uturinde bene abo bantu iteka ryose.

⁹ Dore ingeso mbi zasakaye mu bantu, abagome ntibagira icyo bishisha.