Zaburi 1 - Bibiliya Ijambo ry'imana D

IGICE CYA MBERE (Zaburi 1–41) Hahirwa intungane

¹ Hahirwa umuntu wanga inama z'abagome, ntakurikize imigambi y'abanyabyaha, ntanagirane ibiganiro n'abaneguranyi,

² ahubwo yishimira gukurikiza Amategeko y'Uhoraho, akayazirikana ku manywa na nijoro.

³ Uwo ameze nk'igiti cyatewe hafi y'umugezi, gihora cyerera igihe cyacyo, ibibabi byacyo ntibyigere biraba. Icyo akoze cyose kiramutunganira.

⁴ Nyamara abagome bo si ko bameze, bameze nk'umurama utumurwa n'umuyaga.

⁵ Imana izabacira urubanza batsindwe, ibahēze mu ikoraniro ry'intungane.

⁶ Koko Uhoraho arinda intungane, naho abagome arabatsemba.