Zekariya 13 - Bibiliya Ijambo ry'imana

Imana izatsemba ibigirwamana n'abahanurabinyoma

¹ “Icyo gihe abakomoka kuri Dawidi n'abandi batuye i Yeruzalemu, bazafukurirwa isōko yo kubozaho ibyaha n'ubwandure.”

² Uhoraho Nyiringabo aravuze ati: “Muri icyo gihe nzatsemba ibigirwamana mu gihugu, ku buryo ntawe uzongera kubyibuka ukundi. Nzamenesha kandi mu gihugu abahanurabinyoma, ntsembe n'ishyaka bagirira ibigirwamana.

³ Nihagira uwongera kwiha guhanura, se na nyina ubwabo bazamubwira bati: ‘Ugomba gupfa kuko uvuga ibinyoma, ubeshya ngo watumwe n'Uhoraho.’ Se na nyina bazamutsinda aho agihanura.

⁴ Icyo gihe abahanuzi bose bazagira isoni zo kuvuga ibyo beretswe mu ibonekerwa. Bityo ntibazongera kwambara ibishura by'abahanuzi, kugira ngo babone uko babeshya rubanda.

⁵ Buri wese azavuga ati: ‘Jye sindi umuhanuzi ahubwo ndi umuhinzi, mfite isambu kuva mu buto bwanjye.’

⁶ Nihagira abamubaza bati: ‘Niba utari umuhanuzi izo ndasago zo mu gituza wazitewe n'iki?’ Azabasubiza ati: ‘Nakomerekeye ku ncuti zanjye.’ ”

Iyicwa ry'umushumba

⁷ Uhoraho Nyiringabo aravuze ati: “Wa nkota we, rwanya umushumba ari we mugenzi wanjye! Ica umushumba intama zitatane, kandi n'izikiri nto nzazirwanya.”

⁸ Uhoraho yungamo ati: “Bibiri bya gatatu by'abatuye igihugu bazapfa bashirire ku icumu, kimwe cya gatatu cyonyine ni cyo kizarokoka.

⁹ Abo bagize kimwe cya gatatu nzabagerageza, mbatunganye nk'uko ifeza n'izahabu bitunganyirizwa mu muriro w'uruganda. Bazanyambaza nanjye mbahe icyo basaba. Nzababwira nti: ‘Muri ubwoko bwanjye.’ Na bo bazavuga bati: ‘Uhoraho ni we Mana yacu.’ ”