Zaburi 98 - Bibiliya Ijambo ry'imana

Uhoraho ni Umwami n'Umukiza

¹ Zaburi. Nimuririmbire Uhoraho indirimbo nshya, nimumuririmbire kuko yakoze ibitangaza, ububasha n'imbaraga ze zitagira amakemwa ni byo bituma atsinda.

² Uhoraho yamenyekanishije ko ari Umukiza, agaragariza amahanga ko ari intungane.

³ Yibutse ko yiyemeje kugirira Abisiraheli ineza n'umurava, abo ku mpera z'isi bose biboneye ko Imana yacu yatsinze.

⁴ Mwa batuye ku isi yose mwe, nimuvugirize Uhoraho impundu, nimuturagare muririmbe mwishimye!

⁵ Nimucurangire Uhoraho inanga, mumuririmbire hacurangwa umurya w'inanga.

⁶ Nimuvugirize impundu Umwami ari we Uhoraho, mumuvugirize impanda n'amakondera.

⁷ Inyanja n'ibiyirimo byose nibirangīre, isi n'ibiyiriho na byo nibirangīre.

⁸ Inzuzi nizikome mu mashyi, imisozi na yo nituragare iririmbire Uhoraho.

⁹ Koko agiye kuza gutegeka isi, abo ku isi abategekeshe ubutungane, amahanga yose ayategekane ubutabera.