Zaburi 86 - Bibiliya Ijambo ry'imana

Isengesho ry'umuntu uri mu makuba

¹ Isengesho rya Dawidi. Uhoraho, ntega amatwi untabare, dore ndi umunyabyago n'umukene.

² Undinde kuko ntaguhemukaho, Mana yanjye, ni wowe nizera, jyewe umugaragu wawe unkize.

³ Nyagasani, ngirira impuhwe, ni wowe ntakambira umunsi wose.

⁴ Umugaragu wawe umpe gusābwa n'ibyishimo, Nyagasani, ni wowe ndangamiye.

⁵ Koko Nyagasani, uri umugiraneza n'umunyambabazi, abagutakambira bose urabakunda cyane.

⁶ Uhoraho, umva amasengesho yanjye, tega amatwi ungirire impuhwe.

⁷ Iyo ngize amakuba, ndagutabaza, koko nawe urantabara.

⁸ Nyagasani, nta yindi mana ihwanye nawe, ibyo ukora nta wundi wabigeraho.

⁹ Nyagasani, amahanga yose waremye azakugana, azakwikubita imbere aguheshe ikuzo.

¹⁰ Ni wowe Mana wenyine, urakomeye kandi ukora ibitangaza.

¹¹ Uhoraho, ujye unyigisha uko nkwiye kugenza, nanjye njye ncisha mu kuri kwawe. Mpa kugira umutima umwe kugira ngo njye nkubaha.

¹² Nyagasani Mana yanjye, nzagusingiza mbikuye ku mutima, nzahora nguhesha ikuzo.

¹³ Koko ineza ungirira ni nyinshi, dore warankijije undinda kujya ikuzimu.

¹⁴ Mana, abirasi barampagurukiye, agatsiko k'abanyarugomo kagiye kumpitana, nta n'ubwo bigera bagutinya.

¹⁵ Ariko wowe Nyagasani, uri Imana igira impuhwe n'imbabazi, utinda kurakara kandi wuje urukundo n'umurava.

¹⁶ Ungirire impuhwe unyiteho, umugaragu wawe umpe imbaraga, umwana w'umuja wawe unkize.

¹⁷ Umpe ikimenyetso cy'uko nzagubwa neza, abanzi banjye nibabibona bazamware. Koko Uhoraho, ni wowe untabara ukampumuriza.