Zaburi 7 - Bibiliya Ijambo ry'imana

Gusaba kurenganurwa

¹ Zaburi ya Dawidi itabāza, yayiririmbiye Uhoraho kubera ibibi yagiriwe n'Umubenyamini witwa Kushi.

² Uhoraho Mana yanjye, ni wowe mpungiyeho. Untabare unkize abantoteza bose,

³ ubankize batantanyagura nk'intare, bakangira inyama ntafite untabara.

^4-5 Uhoraho Mana yanjye, niba naracumuye, niba narahemukiye incuti yanjye, niba naragiriye nabi umwanzi wanjye nta mpamvu, niba koko naragenje ntyo,

⁶ abanzi nibankurikirane bancakire, nibandibatire mu mukungugu banyice. Kuruhuka.

⁷ Uhoraho, rakara uhaguruke, uhaguruke urwanye ababisha bandakariye, wowe washyizeho ubutabera ndengera.

⁸ Amahanga yose nakoranire imbere yawe, wicare ahirengeye uyacire imanza.

⁹ Uhoraho, ni wowe ucira amahanga imanza, ushingiye ku butungane bwanjye no ku murava wanjye, Uhoraho undenganure.

¹⁰ Mana Nyirubutungane, ugenzura ibitekerezo n'ibyifuzo by'abantu, utsembe urugomo rw'abagome, naho intungane uzikomeze.

¹¹ Imana ni yo ngabo inkingira, koko igoboka abantu b'intungane.

¹² Imana ica imanza zitabera, ntisiba guhana abagome.

¹³ Iyo umugome atihannye ityaza inkota, ibanga umuheto wayo igatamika imyambi,

¹⁴ yegeranya intwaro zayo zica, yegeranya n'imyambi yayo yaka umuriro.

¹⁵ Dore umugome acura inama mbi, atwita ubugizi bwa nabi, amaherezo bikabyara ibinyoma.

¹⁶ Acukurira abandi urwobo rurerure, nyamara urwobo yacukuye ni we uzarugwamo.

¹⁷ Ibibi bye ni we bigaruka, urugomo rwe ni rwo azira.

¹⁸ Nzashimira Uhoraho ubutungane bwe, Uhoraho Usumbabyose muririmbe.