Zaburi 54 - Bibiliya Ijambo ry'imana

Isengesho ry'umuntu utotezwa

¹ Zaburi y'umuyobozi w'abaririmbyi, iririmbwa hacurangwa umurya w'inanga. Ni igisigo gihanitse cya Dawidi.

² Yagihimbye igihe Abanyazifu basangaga Sawuli bakamubwira ko Dawidi yihishe iwabo.

³ Mana, unkure mu kaga kubera ubushobozi bwawe, ni wowe ufite ububasha undenganure.

⁴ Ayii! Mana, umva ugusenga kwanjye, tega amatwi wumve ibyo nkubwira.

⁵ Abanyamahanga barampagurukiye, abanyarugomo barashaka kunyica, nta gutinya Imana bibarangwaho. Kuruhuka.

⁶ Dore Imana ni yo ingoboka, Nyagasani ari ku ruhande rw'abanshyigikira.

⁷ Mana, abanzi banjye ubiture ibibi bangirira, ubatsembe kubera ko ucisha mu kuri.

⁸ Uhoraho, nzagutambira igitambo mbikuye ku mutima, nzagushimira kubera ineza ugira.

⁹ Koko wankijije amakuba yanjye yose, none ababisha banjye ndabishima hejuru.