Zaburi 51 - Bibiliya Ijambo ry'imana

Isengesho ryo gusaba imbabazi

¹ Zaburi y'umuyobozi w'abaririmbyi. Ni iya Dawidi.

² Yayihimbye igihe umuhanuzi Natani yari amaze kumugenderera, akamucyaha kubera ko yaryamanye na Batisheba.

³ Mana, kubera urukundo rwawe rwinshi umbabarire, kubera impuhwe zawe nyinshi umpanagureho ibicumuro byanjye.

⁴ Nyuhagira rwose umareho ibibi nakoze, unsukure umpanagureho icyaha cyanjye.

⁵ Koko ndemera ko nagucumuyeho, icyaha nakoze sinshobora kucyibagirwa.

⁶ Ni wowe, wowe wenyine nacumuyeho, narakugomeye nkora ibibi. Ibyo unshinja bifite ishingiro, urubanza uncira ni urw'ukuri.

⁷ Ndi umunyabyaha kuva nkivuka, ndetse ndi we kuva mama akinsama.

⁸ Erega icyo wifuza ni ukuri kuvuye ku mutima! Noneho unyigishe ubwenge ubuncengezemo.

⁹ Umpanagureho ibyaha mbonere, unyuhagire nere de ndushe inyange.

¹⁰ Umpe kongera kugira ibyishimo n'umunezero, nubwo wankubise ukanshegesha umpe kongera kwishima.

¹¹ Wirengagize ibyaha byanjye, umpanagureho ibicumuro byanjye byose.

¹² Mana yanjye, undememo umutima uboneye, umvugurure ngire umutima ukumvira.

¹³ Ntunte kure yawe, ntunkureho Mwuka Muziranenge wawe.

¹⁴ Unsubizemo ibyishimo by'uko wankijije, unshyigikire kubera ubuntu ugira.

¹⁵ Ni bwo nzigisha abakugomera gukora ibyo ushaka, bityo n'abanyabyaha bakugarukire.

¹⁶ Mana, Mana Mukiza wanjye, umbabarire kubera umuntu nishe, umbabarire mbone uko namamaza ko uri intungane.

¹⁷ Nyagasani, nyemerera ngire icyo mvuga, ni bwo nzagusingiza.

¹⁸ Ni uko utishimira ibitambo, naho ubundi mba mbigutuye, ibikongorwa n'umuriro na byo ntubyishimira.

¹⁹ Ahubwo Mana, igitambo wishimira ni ukwicisha bugufi, Mana, umuntu wicisha bugufi akihana ntumusuzugura.

²⁰ Girira neza Siyoni kubera ko uhakunda, wongere wubake urukuta rwa Yeruzalemu.

²¹ Ubwo ni bwo uzishimira ibitambo biboneye bagutura, wishimire n'ibikongorwa n'umuriro n'amaturo atagabanyijeho, ni bwo bazatamba amapfizi ku rutambiro rwawe.