Zaburi 24 - Bibiliya Ijambo ry'imana

Igisingizo cy'Umwami nyir'ikuzo

¹ Zaburi ya Dawidi. Isi n'ibiyuzuye byose ni iby'Uhoraho, abayituyeho bose na bo ni abe.

² Ni we wayishimangiye ku nyanja, yayiteretse ku mazi menshi.

³ Ni nde uzemererwa kuzamuka umusozi w'Uhoraho? Ni nde uzemererwa guhagarara mu Ngoro ye nziranenge iwubatseho?

⁴ Ni ufite ibikorwa bitagira amakemwa, akagira umutima uboneye, ntasenge ibigirwamana cyangwa ngo arahire ibinyoma.

⁵ Uhoraho azamuhundazaho imigisha, Imana Umukiza we izamubara nk'intungane.

⁶ Iyo ni yo myifatire y'abayiyoboka, abasenga Imana ya Yakobo ni ko bagenza. Kuruhuka.

⁷ Nimukingure amarembo muyarangaze, inzugi zabayeho kuva kera muzikingure, Umwami nyir'ikuzo abone uko yinjira.

⁸ “Mbese uwo Mwami nyir'ikuzo ni nde?” Ni Uhoraho nyir'imbaraga n'ubutwari, ni Uhoraho intwari itsinda ku rugamba.

⁹ Nimukingure amarembo muyarangaze, inzugi zabayeho kuva kera muzikingure, Umwami nyir'ikuzo abone uko yinjira.

¹⁰ “Ariko se uwo Mwami nyir'ikuzo ni nde?” Uwo Mwami nyir'ikuzo ni Uhoraho Nyiringabo. Kuruhuka.