Zaburi 15 - Bibiliya Ijambo ry'imana

Ibiranga abayoboke b'Uhoraho

¹ Zaburi ya Dawidi. Uhoraho, ni nde uzemererwa kwinjira mu Ngoro yawe? Ni nde uzatura ku musozi witoranyirije?

² Ni umuntu w'indakemwa, ukora ibitunganye, uvuga ukuri kose ntaryarye,

³ utigera asebya abandi, utagirira mugenzi we nabi, udatuka umuturanyi we,

⁴ uhinyura abantu b'imburamumaro, wubaha abatinya Uhoraho, utisubiraho ngo areke icyo yasezeranye n'iyo cyamuteza ingorane,

⁵ utaguriza abandi abashakamo inyungu, utemera ruswa ngo arenganye umwere. Ugenza atyo ntakizamuhungabanya.