Zaburi 149 - Bibiliya Ijambo ry'imana

Indirimbo y'indahemuka z'Imana

¹ Haleluya! Nimuririmbire Uhoraho indirimbo nshya, nimumusingirize mu ikoraniro ry'indahemuka ze.

² Abisiraheli nibishimire Umuremyi wabo, abatuye Siyoni banezererwe Umwami wabo.

³ Nibamusingize bamubyinira, nibamusingize bavuza ishakwe n'inanga.

⁴ Koko Uhoraho yishimira ubwoko bwe, aboroheje abahesha icyubahiro akabakiza.

⁵ Indahemuka ze nizīshīmire ikuzo aziha, nizitere hejuru zīshime ziri ku mariri yazo.

⁶ Nizihanike zogeze Imana, niziyogeze zifashe mu ntoki inkota zityaye.

⁷ Nizifate inkota zijye guhōra amahanga, abanyamahanga zibahane.

⁸ Abami babo zibaboheshe iminyururu, abategetsi babo zibaboheshe amapingu.

⁹ Zibasohorezeho iteka Imana yari yarabaciriye. Ibyo bizahesha ishema indahemuka zayo zose. Haleluya!