Zaburi 141 - Bibiliya Ijambo ry'imana

Kutifatanya n'inkozi z'ibibi

¹ Zaburi ya Dawidi. Uhoraho, ndagutakambiye tebuka untabare, ningutakambira ujye untega amatwi.

² Amasengesho yanjye akugereho akubere nk'imibavu, kukwambaza ngutegeye amaboko kukubere nk'igitambo cya nimugoroba.

³ Uhoraho, undinde mu byo mvuga, undinde hatagira ijambo ribi rinsohoka mu kanwa.

⁴ Ntunkundire gutekereza gukora ibibi, ntunkundire kwiroha mu bikorwa by'ubugome, ntunankundire kwifatanya n'inkozi z'ibibi ngo nsangire na zo.

⁵ Intungane impannye yaba ingiriye neza, incyashye sinabyanga kuko yaba impesheje icyubahiro. Icyakora mpora nsenga namagana ibikorwa by'inkozi z'ibibi.

⁶ Abategetsi bazo bazarohwe mu manga, na zo zizamenyeraho ko ibyo navuze bifite ishingiro.

⁷ Zizavuga ziti: “Nk'uko umuhinzi asandaza ikinonko, ni ko amagufwa yacu yasandaye ku mva.”

⁸ Uhoraho Nyagasani, ni wowe mpanze amaso, ni wowe mpungiyeho ntundeke ngo mpfe.

⁹ Undinde umutego banteze, undinde kugwa mu gico cy'inkozi z'ibibi.

¹⁰ Umutego abo bagome bateze nibabe ari bo bawugwamo, naho jyewe nywurokoke.