Zaburi 14 - Bibiliya Ijambo ry'imana

Uhoraho arwanya inkozi z'ibibi

¹ Zaburi y'umuyobozi w'abaririmbyi. Ni iya Dawidi. Abapfu bibwira ko nta Mana ibaho. Bene abo bantu bariyonona, bakora ibibi biteye ishozi, nta n'umwe ukora ibikwiye.

² Uhoraho ari mu ijuru yitegereza abantu, aritegereza ngo arebe ko hariho umuntu usobanukiwe akaba amwambaza.

³ Erega bose bateshutse ku Mana! Bose uko bangana bariyononnye, nta wukora ibikwiye habe n'umwe! Uhoraho arabaza ati:

⁴ “Izo nkozi z'ibibi zose ntizizi ko nzireba? Zitunzwe no kurya ubwoko bwanjye imitsi, nta n'ubwo zijya zinyambaza.”

⁵ Ngizo zihiye ubwoba, zihiye ubwoba kubera ko Imana ishyigikira indahemuka.

⁶ Mwa nkozi z'ibibi mwe, muburizamo imigambi y'abanyamibabaro, ariko Uhoraho ni we buhungiro bwabo.

⁷ Icyampa Uhoraho agakiza Abisiraheli aturutse i Siyoni! Uhoraho nasubize abantu be ubusugire bwabo, ni bwo Abisiraheli ari bo rubyaro rwa Yakobo bazishima banezerwe.