Zaburi 110 - Bibiliya Ijambo ry'imana

Umwami n'umutambyi

¹ Zaburi ya Dawidi. Uhoraho yabwiye umwami wanjye ati: “Icara ku ntebe ya cyami iburyo bwanjye, nanjye nzahindura abanzi bawe nk'akabaho ukandagizaho ibirenge.”

² Uhoraho nashimangire ingoma yawe, ayagūre ahereye i Siyoni, nawe ngaho ganza abanzi bawe.

³ Umunsi uzakoranya ingabo zawe, abantu bawe bazitanga babikunze, bazaba bisukuye biboneje. Abasore bazakugeraho kare, bazindutse nk'ikime cyo mu museso.

⁴ Uhoraho yararahiye kandi ntazivuguruza, yaravuze ati: “Uri umutambyi iteka ryose, mu buryo bwa Melikisedeki.”

⁵ Umwami uri iburyo bwawe, ku munsi azarakarira abami azabatsemba.

⁶ Azacira abanyamahanga urubanza, imirambo izaba iri hose, atsembe n'abatware ku isi yose.

⁷ Umwami akiri mu rugendo azanywa ku mazi y'umugezi, atabarukane ishema.