Yonasi 2 - Bibiliya Ijambo ry'imana

¹ Uhoraho ategeka igifi kinini kimira Yonasi. Nuko Yonasi amara iminsi itatu n'amajoro atatu mu nda y'icyo gifi.

Yonasi asenga Imana

² Yonasi ari mu nda y'igifi, asenga Uhoraho Imana ye agira ati:

³ “Uhoraho, ndi mu kaga, naragutakambiye urangoboka. Urupfu na rwo rumize, ngutabaje urantabara.

⁴ Wandoshye ikuzimu mu nyanja rwagati, umuvumba w'amazi urangota, unteza umuhengeri n'imiraba bindenga hejuru.

⁵ Ni ko kwibwira nti: ‘Uhoraho kuri wowe mbaye igicibwa nyamara nkomeje guhanga amaso Ingoro yawe.’

⁶ Amazi aranyuzuye arenda kumpitana, inyanja indenze hejuru, ibimera mu mazi binyizingiye ku mutwe.

⁷ Naramanutse ngera hasi mu imerero ry'imisozi, ibihindizo by'iwabo w'abapfuye binkingirwaho burundu. Ariko wowe Uhoraho Mana yanjye, uzanzamura muri uwo mworera ndi mutaraga!

⁸ Ubwo ubugingo bwarimo buncika, wowe Uhoraho narakwibutse, ndakwambaza. Isengesho ryanjye rikugeraho uri mu Ngoro yawe.

⁹ Abaramya ibigirwamana bivutsa imbabazi!

¹⁰ Ariko jyewe nzamamaza ishimwe ryawe, nguture ibitambo, nguhigure imihigo nahize, wowe Uhoraho sōko y'agakiza.”

¹¹ Nuko Uhoraho ategeka cya gifi kiruka Yonasi imusozi.