Yesaya 12 - Bibiliya Ijambo ry'imana

Gusingiza Imana Umukiza

¹ Icyo gihe uzavuga uti: “Uhoraho ndagushimiye, ndagushimiye nubwo wari warandakariye, uburakari bwawe bwarashize urampumuriza.

² Imana ni yo gakiza kanjye, ndayiringiye sinkigira ubwoba, Uhoraho ni we mbaraga zanjye ndamusingiza, koko ni we wankijije.”

³ Muzavoma amazi munezerewe, muzayavoma ku masōko y'agakiza.

⁴ Icyo gihe muzavuga muti: “Nimushimire Uhoraho mwambaze izina rye, nimwamamaze mu mahanga yose ibyo yakoze, nimwamamaze hose izina rye ritangaje.

⁵ Nimuririmbire Uhoraho kuko yakoze ibitangaje, nimubimenyekanishe ku isi hose.”

⁶ Abatuye Siyoni nimurangurure amajwi, nimuririmbe munezerewe, koko ukora ibikomeye muri mwe, uwo ni we Mana Nziranenge ya Isiraheli.