Yeremiya 45 - Bibiliya Ijambo ry'imana

Ubutumwa bwagenewe Baruki

¹ Mu mwaka wa kane Yoyakimu mwene Yosiya ari ku ngoma mu Buyuda, ni bwo Baruki mwene Neriya yanditse mu muzingo w'igitabo amagambo yabwiwe n'umuhanuzi Yeremiya. Nuko Yeremiya aramubwira ati:

² “Dore ibyo Uhoraho Imana y'Abisiraheli akubwira:

³ waravuze uti: ‘Ngushije ishyano! Nari nsanganywe intimba none Uhoraho ageretseho ingorane. Ndananiwe kubera gutaka, nta n'ubwo nkiruhuka.’ ”

⁴ Yeremiya yungamo ati: “Ngubu ubutumwa Uhoraho yambwiye kukugezaho. Aravuga ati: ‘Ngiye gusenya ibyo nubatse, ndimbure ibyo nateye mu gihugu cyose.

⁵ Nyamara wowe ushaka ibintu bihambaye! Sigaho kubishaka. Dore ngiye guteza ibyago abantu bose, ariko wowe humura nta cyo uzaba. Nzakurinda aho uzajya hose.’ ”