Ibyahisuwe 15 - Bibiliya Ijambo ry'imana

Abamarayika n'ibyago birindwi biheruka

¹ Nyuma mbona mu ijuru ikindi kimenyetso gikomeye kandi gitangaje: ni abamarayika barindwi bacigatiye ibyago birindwi by'imperuka, ari ibyo Imana yarangirijemo uburakari bwayo.

² Nuko mbona igisa n'ikiyaga cy'ibirahure bivanzwemo umuriro. Mbona n'abatsinze cya gikōko n'ishusho yacyo, kandi batsinze wa mubare uranga izina ryacyo. Bari bahagaze ku kiyaga cy'ibirahure bafashe inanga bahawe n'Imana.

³ Baririmbaga indirimbo ya Musa umugaragu w'Imana, n'indirimbo y'Umwana w'intama bagira bati: “Nyagasani Mana Ishoborabyose, mbega ukuntu ibyo ukora bikomeye kandi bitangaje! Wowe Mwami ugenga amahanga, mbega ukuntu imigenzereze yawe ari iy'ubutabera n'ukuri!

⁴ Nyagasani, ni nde utagutinya? Ni nde utagusingiza? Ni wowe Muziranenge wenyine. Amahanga yose azaza akwikubite imbere, azakuramya kuko ibikorwa byawe by'ubutabera byagaragaye.”

⁵ Nyuma y'ibyo mbona mu ijuru Ingoro y'Imana irakinguwe, ari ryo Hema rihamya Isezerano yagiranye n'abayo.

⁶ Ba bamarayika barindwi bacigatiye bya byago birindwi basohoka muri iyo Ngoro, bari bakenyeye mu gituza imyenda ikenkemuye kandi irabagirana, bayikenyeje imikandara y'izahabu.

⁷ Kimwe muri bya binyabuzima bine giha ba bamarayika barindwi inzabya ndwi z'izahabu, zuzuye uburakari bw'Imana ihoraho iteka ryose.

⁸ Iyo Ngoro yuzura umwotsi kubera ikuzo ry'Imana n'ububasha bwayo. Nta muntu n'umwe wabashije kwinjira mu Ngoro, kugeza ubwo ibyago birindwi byazanywe n'abamarayika barindwi birangiye.