Yaŋ 67 - Yennu Gbouŋ Mɔɔr

Niipoturu yaŋ

¹ Yennu, a tinit ninbaauk, ki teen piisin ti paak, ki gotit nan burchint,

² ki lin te durinya teeb kur n bann a yanbɔɔt, ki bia te digbana teeb kur n la a tinnu.

³ Yennu, ŋaant niib n donta, ki bia te niib kur n paka.

⁴ Ŋaant ki digbana teeb-ii mɔk parpeenn ki yin yanii nan kpinkpammuk, kimaan a bu niib buut nan barmɔnii, ki bia ŋmakitir digbana kur tingbouŋ na paak.

⁵ Yennu, ŋaant niib kur n donta, ki bia te niib kur n paka,

⁶ ki li saa te tiŋ na n nan jeet. Yennu, fin nba tee ti Yennu na, teen piisin ti paaka.

⁷ Yennu saa teen piisin ti paak, ki tingbouŋ na niib kur saa baakɔ.