Yaŋ 52 - Yennu Gbouŋ Mɔɔr

Yennu buut nan u ninbatinu

¹ Bee ki a dont a mɔŋ nan toonbiiti, fin nijaann na? Yennu lomm be-e mɔkmɔk nan mɔkmɔk.

² A lorin a fan biir leeb, ki a mɔb di nan bilepaann na, ki a fa fai,

³ ki loon bonbiir ki gar bonŋann, ki loon faak ki gar barmɔnii,

⁴ ki loon faak nba saa pak ki biir a leeb, faak daanɔ na.

⁵ Barmɔnii, Yennu saa biirae fas fas; u saa soorae ki dat nyinna a ŋaak ni; u saa nyinna nisaarii tiŋ na ni,

⁶ ki niŋamm saa la linba na ki tin jaŋmaanii, ki bi saa laa laat ki yet a,

⁷ “Gotir, jɔɔ nba nae ki jii u mɔŋ tur Yennu, ŋaan maa u mɔkint paak, ki dukii nan nɔɔnbiite saa sommɔ.”

⁸ Min ŋarin tee nan kpan tiik nae, ki see Yennu ŋasaakak ni. N yada yɔɔ be u lomm nba be mɔkmɔk nan mɔkmɔk na nie.

⁹ Yennu, n sii tun ki teena niipoouko, faa tun linba ki turin na paak, a sann nie ki n mɔk dindann, kimaan a sann ŋan, ki n saa dont a sann maŋ, a niib tɔɔnn.