Yaŋ 149 - Yennu Gbouŋ Mɔɔr

Dontir yaŋ

¹ Pakin Yennu man. Yinin yanpaaŋ ki tur Yennu, ki dontɔ, u niŋamm tintaanu ni.

² Israel teeb, ii mɔk parpeenn man, kimaan i naamii daanɔ paak. Sayɔnn teeb, ii kpamm man, kimaan i Kpanbar maŋ paak.

³ Ii waa waak kii dont u sann, ii faa gingana nan kɔna ki dontɔ.

⁴ Yennu par mei u niib paake, ki u teen sikin-n-mɔŋ damm na nyannu.

⁵ Ŋaant ki Yennu niib-ii kpamm, kimaan baa nyann na paak, ki yin kpinkpammuk yanii nyɔtunmunn.

⁶ Ŋaant ki bii hoot kii dontir Yennu, ki bi jukbanjai nba di bonchiann na-ii be bi nii ni,

⁷ ki te ki bin nyann digbana na, ki dat niib na tuba,

⁸ ki baan bi kpanbara na jarit, ki bia baan bi tɔɔndamm na kut jarit,

⁹ ki dat digbana na tuba, nan Yennu nba senn biaŋinba na. Yennu niib nyannue na. Pakin Yennu man.