Yaŋ 148 - Yennu Gbouŋ Mɔɔr

Durinya kur n dont Yennu

¹ Pakin Yennu man. Pakimɔ man sanpagbant ni, yimm nba be sanpaapo na.

² Pakimɔ man, yimm nba tee u malakanba na, yimm nba tee sanpaapo kunkɔnkɔnna na.

³ Yonnu nan ŋmaarik n pak ki dontɔ, pakimɔ man, yimm nba tee ŋmaabirnyinyira na.

⁴ Sanpaak nan nyun nba be sanpagbant liik po na n pak dontɔ.

⁵ Ŋaant ki bi kur n pak dont Yennu sann, kimaan u din pak mɔmaame ki namm.

⁶ U sennue din te ki bi be bi binbeboa yaayoo siiyoo, ki kan fit yêt u mɔb.

⁷ Yimm nba be tingbouŋ na paak, ii pak dont Yennu man, nyun ni bonkob-gbeŋa nan nyunsunsunt kur,

⁸ li sanyikintii nan sakaana, nan wunn nan sanpagbant, nan wonpaaruk nba saak u mɔb na.

⁹ Jɔjaana nan kunkona nan tilontii nan fɔɔr, ii dont Yennu man,

¹⁰ bonkobit kur, li ŋaak ni yab nan muuk ni yab, bonbubɔkit nan bon-yuyukit.

¹¹ Ii pak dontɔ man, kpanbara nan niib kur, kpanbar ŋaajab nan doo diara kur,

¹² sapaamm nan naasimm, nikpera nan waas,

¹³ ŋaant ki bi kur n pak dont Yennu sann. U sann yab ki gar sanlia kur, ki u baakir yab ki gar sanpaak nan tingbouŋ na kur.

¹⁴ U te ki u digbann na mɔk paŋ ki li te u niib kur dontirɔe, Israel niib nba ki u loomm bonchiann na. Pakin Yennu man.