Yaŋ 147 - Yennu Gbouŋ Mɔɔr

Dontir nba saa Yabint Yennu boor

¹ Pakin Yennu man. Li ŋan ki tin yin dontir yanii ki tur Yennu; li ŋan ki bia took nan tin kpakitɔ.

² Yennu ŋammit Jerusalem-e, u jent nan binba ki datai din soorib ki yaat namm nae.

³ U teen binba para ni la daŋ nae laafia, ki lorin bi fiat.

⁴ Ŋɔɔe nan ŋmaabira, ki bi kann yab dian waa loon biaŋinba, ki u tuu yiin ŋmaabir kur nan u sann.

⁵ Ti Yomdaanɔe tee Yenjaann ki mɔk paŋ, ki u yanfoon kaa bikinu.

⁶ Yennu-e dont binba mɔk sikin-n-mɔŋ na, ŋaan sikint biit damm na tiŋ ni.

⁷ Yinin dontir yaŋ kii teen Yennu man; faan kɔnn ki yin yaŋ ki tur ti Yomdaanɔ man.

⁸ Ŋɔɔe te sanpagbant baak sanpaapo; ŋɔɔe te saak baa tingbouŋ na paak, ki te mɔɔt pia kunkona paak.

⁹ Ŋɔɔe teen bonkobit jeet ki bi di, ŋɔɔe dint kinkabira yoo nba ki bi mɔ kon.

¹⁰ U parpeenn ki be tanpaarii ni kaa, koo u par ki mei kunkɔnkɔnna nba mɔk para paak kaa,

¹¹ ŋaan u par mei damm nba baakitɔ na paake, nan damm nba teen yada nan u lomm nba kaa gbennu na paak.

¹² Jerusalem, pakin Yennu. Sayɔnn doo, pakin a Yennu.

¹³ Ŋɔɔe te ki a tammɔkɔɔka wakii. Ŋɔɔe tee piisin a niib paak.

¹⁴ Ŋɔɔe te ki a tiŋ be li yamani, ki jikit jeŋant ki gboonta.

¹⁵ U tuu tur tingbouŋ na mɔbe, ki linba ki u yet na n tun yiama.

¹⁶ U tuu te ki wunn n yat nan gbent nae, ki bia yat marin nan tangbiruŋ na,

¹⁷ ki te ki sakaana n baa nan tansakina na, ki sɔɔ kaa ki saa fit took waat nba ki u tuu tun na.

¹⁸ Ŋaan wuu yet mɔmaan, nyuntana na tuu nanne, u tuu tun wouŋo ki te ki nyun puub.

¹⁹ U tuu jii mɔmaame ki tur u niib, ki jii u wannu nan u sennii ki tur u niib Israel teeb,

²⁰ ŋaan u ki tun linba na booru ki tur nileeb na, bi ki mi u sennii maŋi. Pakin Yennu man.