Yaŋ 146 - Yennu Gbouŋ Mɔɔr

Dontir nba saa tinnu Yennu boor

¹ Pakin Yennu man. N seek, pakin Yennu.

² N saa dont ŋɔɔe n manfoor kur ni; n saa yin yaŋ ki tur Yennu-e.

³ Daa jikit a dindann ki tee nisaarii tɔɔndamm ni; nisaarik kaa ki saa fit tinna.

⁴ Bi-i kpo, bi tuu ŋmat kpant tante, li daar maŋ, bi lora kur tuu kpakin yanne.

⁵ Parpeenn be daanɔ nba ki Yennu nba ki Jakɔb jiantir na tee u sommtɔɔ na paak, wunba ki u dindann maa u Yomdaanɔ Yennu maŋ paak na,

⁶ Yennu nba nan sanpaak nan tiŋ nan mɔkgbeŋa nan linba kur be li ni. U yɔɔ dia u mɔsonae,

⁷ ki bu sommit binba be mukisuk ni, ki bia teen komma na jeet. Yennu-e nyint dansarkɔɔra yann,

⁸ ki bia te jɔɔnii nyɔɔntir. Ŋɔɔe fiint binba baa na, ki mɔk lomm nan u popeendamm.

⁹ Yennu-e guu saamm nba be ti tiŋ na ni, ŋɔɔe sommit pakɔi nan kpeebii, ŋaan biir biit damm na lora.

¹⁰ Yennu-e tee kpanbar yoo kur. Sayɔnn doo, a Yennu nae sii yɔɔ dia-a yaayoo nan yaayoo. Pakin Yennu man.