Yaŋ 145 - Yennu Gbouŋ Mɔɔr

Dontir yaŋ

¹ Yennu nba tee n kpanbar, n saa mɔɔnt a yabint; n saa tura niipoouk mɔkmɔk nan mɔkmɔk.

² N sii teena niipoouk daar kur, n saa donta yaayoo siiyoo.

³ Yennu tee Yenjaanne, li ŋan ki tin donnɔ sanpaapo. U yabint na gar nisaarik bannuwa.

⁴ Maaryenn tuu saa wann maarleer na fin Yennu nba tun linba, ki donta, bi saa mɔɔnt a toonjaana,

⁵ ki pak a baakir nan a yabint po, ki n sii dukii a bakitnauŋ toona po.

⁶ Niib saa pak a toonjaana po, ki man mɔɔnt a yabint po.

⁷ Bi saa pak a ŋamm kur po, ki yin yanii ki jiin a popeensin po.

⁸ Yennu mɔk lomm nan ninbatinu, u wutoor ki do yian, ki u lomm bia kaa gbennu.

⁹ U ŋane ki tur sɔɔ kur, ki mɔk ninkpabauŋ u naamii kur paak.

¹⁰ Yennu, a naamii kur saa dont a sann, ki a niib kur saa tura niipoouk.

¹¹ Bi saa pak a naan baakir paŋ po, ki wann a yabint po,

¹² ki lin te sɔɔ kur n bann a paŋ toona, nan a naangbouŋ baakir nan yiikoo po.

¹³ A naan kaa gbennu, ki a sii yɔɔ dia a niib. Yennu see u mɔsona paake, ki mɔk ninbatinu u toona kur ni.

¹⁴ U sommit binba be daamii nie, ki fiint binba baa na.

¹⁵ Bonfoor kur dindann maa a paake, ki a teemm jeet yoo nba kur ki bi loon.

¹⁶ A tuu tur ki lin jaŋibe, ki gboont sɔɔ kur.

¹⁷ Yennu toona kur ŋane, ki u bia mɔk ninbatinu, u toona kur ni.

¹⁸ Yennu ki fɔk nan binba kur yiu na, binba yiu nan bi para kur na.

¹⁹ Ŋɔɔe teen binba teenɔ baakir na bi bonloŋa, u gbia bi fabinii ki tuu tinnib.

²⁰ Ŋɔɔe guu binba loonɔ na kur, ŋaan u saa biir biit damm nawa.

²¹ N sii yɔɔ piak Yennu-e; ŋaant ki u naamii kur n pak dont u kasii sann yaayoo nan yaayoo.