Yaŋ 144 - Yennu Gbouŋ Mɔɔr

Kpanbar nba teen Yennu niipoouk ki jiin nyannu po

¹ Pakin Yennu nba tee n guutɔɔ na. Ŋɔɔe tumiin tɔb faanu, ki te ki n teen siir ki guu kɔnn.

² Ŋɔɔe tee n gaartɔɔ nan n guutɔɔ, ŋɔɔe tee n sindandiiuk nan n tinntɔɔ; n tinnu dindann be u nie, ŋɔɔe sikin digbana tiŋ ni ki turin.

³ Yennu, nisaarik tee bee ki a fiin u po, nisaarik mun ki a baka be u ni?

⁴ Nisaarik tee nan foon nae, ki u daa gaar nan yinyuŋ nba gaar na.

⁵ Yennu, bɔkitir sanpagbouŋ ki sik; a sii jɔjaana na ki munyuut n nyi bi ni.

⁶ Tumin sanyikintii ki lin yat a datai. A tɔ a peenii na ki a datai n chiar.

⁷ Tantir a nuu ki sikin tiŋ ni, ki datin ki nyinnin nyunsunsuŋ ni ki fatin, ki nyinnin boorganu nuu ni,

⁸ boorganu nba ki piak barmɔnii, ŋaan fa faak kuukɔɔ nan bi mɔpora niwa na.

⁹ Yennu, n saa yin yanpaaŋ ki tura, n saa faa kɔnn ki yin yaŋ ki tura.

¹⁰ Fine tur kpanbara nyannu, ki tinn a toontunnɔ Defid, ki u nyii takoobporimii ni.

¹¹ Nyintin n databiit nuu ni, nyintin boorganu yiikoo ni; boorganu nba ki piak barmɔnii, ŋaan fa faak kuukɔɔ nan bi mɔpora niwa na.

¹² Ŋaant ki ti bonjai nba be bi paauŋ ni na n kpaat nan bonbuburit nba kpaatir nan paŋ biaŋinba na. Ŋaant ki ti bonpoi-ii tee nan kpanbar ŋaadachaata nba be lɔtii ni ki faŋit kpanbar ŋaak biaŋinba na.

¹³ Ŋaant ki ti boa n gbee nan jebooru kur, ŋaant ki ti pei n mar pebis tusaa piik piik.

¹⁴ Ŋaant ki ti bonkobit n pɔt bonchiann, ki daa miin, koo ki kpenni. A daa te ki parbiir mɔŋ be ti doo sɔnii ni.

¹⁵ Parpeenn be digbann nba ki maan na tee mɔnii ki turib na paak; parpeenn be niib nba ki bi Yomdaanɔ tee Yennu na paak.