Yaŋ 143 - Yennu Gbouŋ Mɔɔr

Yenmiaru nba jiin sommir po

¹ Yennu, gbatir n miaru. A popeensin ni, a gbiint n fabinii. Turimin gatu a mamɔmm paak.

² A daa bu min nba tee a toontunnɔ na buut, sɔɔ kaa ki tee kasii a tɔɔnni.

³ N dataak tɔkiime ki saa soorin ki nyannin. U kɔɔnin bunbɔnn dansarik nie, ki n tee nan binba din kpo sianyoowa na,

⁴ ki n ji loon man ŋaa tamae, n be parbiir nba kaa paak nie.

⁵ N tian daa nba gar na po, ki dukii faa tun linba po, ki tian linba kur ki a tun.

⁶ N dont n nii sanpaapo ki meia, ki loona nan tinkooŋ nba loon nyun biaŋinba na.

⁷ Yennu, turimin gatu mɔtana. N ji ki mɔk dindann nan waama, a daa nyikitimi. Li-i tee ki a nyikin, n saa pukin binba sik kpeentiŋ na poe.

⁸ Sanyiɔk kur, a tuu tiarin a lomm nba kaa gbennu na po, kimaan fine ki n teena yada. N miaru do a boor nie. Wantin sɔnu nba ki n saa tɔkin.

⁹ Yennu, n baat a boor ki loon guuru, nyintin n datai nuu ni.

¹⁰ Fine tee n Yennu, wantin biaŋinba ki n saa tun a loomm. Ii ŋan ki turin, ki tɔkin nanin sɔnŋanu.

¹¹ Yennu, tintin nan faa senn mɔsonn biaŋinba na, jiin a ŋant na ki nyinnin daamii ni.

¹² Faa mɔk lomm nanin na paak, a kpi n datai ki biir binba dintin biak na, kimaan n tee a toontunnɔe.