Yaŋ 140 - Yennu Gbouŋ Mɔɔr

Yenmiaru nba saa gɔɔr bonbiir

¹ Yennu, fatirin biitdamm nuu ni. A nyinnin kpikpirukdamm boor ni.

² Yoo kur bi lorin biite, ki baat nan kɔna yoo kur.

³ Bi mɔi ton nan waalabirii yara nae, ki bi maan ton nan waajiɔŋ lɔbit na.

⁴ Yennu, nyintin biit damm paŋ ni, ki bia gɔɔrin nikpiirit boor, binba lorin n baak po na.

⁵ Karinbaandamm pii baruko ki guunin; bi pii tanbarae ki birin barit sɔnjouk ni, a bin soorin.

⁶ N yeen Yennu a, “Fine tee n Yennu.” Yennu, gbiintir mɔnii nba ki n mɔ ki loon sommir na.

⁷ N Yomdaanɔ Yennu nba tee n fat-tɔɔ na, fine nyinnin tɔb ni.

⁸ Yennu, a daa teen biitdamm na baa loon linba; a daa te ki bi laat nyannu bi lorbiit ni.

⁹ A daa te ki n datai na laat nyannu; a te ki bi lorbiit nba ki bi lor n paak na n ŋmat baa bi paak.

¹⁰ Ŋaant ki musankɔɔna n baa bi paak; ŋaant ki bin baa bootuk ni ki ji daa mi do.

¹¹ Daa te ki binba fa faak ki paa leeb na laat nyannu; ŋaant ki biit n nyann kpikpirukdamm ki biirib.

¹² Yennu, n mi nan fine taant tarii po, ki sommit binba be daamii ni.

¹³ Popeendamm na set saa dontawa, bi sii be a boore.