Yaŋ 139 - Yennu Gbouŋ Mɔɔr

Ki jiin Yennu yanchiɔŋ nan gotŋanu po

¹ Yennu, a fiitirime ki mi maa tee biaŋinba.

² A mi linba kur ki n tuun; fi-i lekii be banfɔkira, ŋaan a bant n dudukit.

³ Maa tuun toonni, maa foi-i, ŋaan a laatime, a mi n toona kur.

⁴ N tuu tan piak na ki poŋ sɔɔ ki a mi maa saa pak linba.

⁵ A ŋaa lint n munn poe; ki tuu jii a paŋ ki nyinnin daamii ni.

⁶ Faa min biaŋinba, li sumii bonchiann, ki gar n bannuwa.

⁷ N saa saan lee ki a kan lami? N saa tɔkin lee ki bot a boori?

⁸ Mi-i doo sanpanaagbeŋ, a poŋ be leŋe, mi-i sik kpeentiŋ, ki a be leŋ.

⁹ Mi-i yukir nan nɔɔŋ na ki saan yondopo, koo ki be yonbaapo banfɔkira,

¹⁰ a poŋ be-e ki saa gar n tɔɔnn ki sommin.

¹¹ N bo saa yet bunbɔnne ki wun bɔrin, koo yentu ki wun kpant nyiɔk,

¹² ŋaan bunbɔnn ki bɔn a boori, nyiɔk yeen nan yonnu ni nae ki tura. Bunbɔnn nan yentu tee yomme a boor.

¹³ Fine nan n gbanant kur; fine taan n gbanant, n naa poor ni.

¹⁴ N dontira, kimaan faa namin biaŋinba, li mɔk bakitnauŋ nan yaarlituk, linba ki a tuun kur tee bonsaanne, ki bia tee bakitnauŋ. N mir nan n par kur.

¹⁵ Yoo nba ki a din nan n kpaba ki taanir ki dekin birir soon nna, n naa poor ni, siaminba ki n bɔr ki kpaatir na, a poŋ din mi nan n be leŋ.

¹⁶ A din lamewa ki bi tan marin. Daa nba ki n sii be n manfoor ni, li poŋ sɔbe ki dɔɔ a gbouŋ niewa, ki n tan baar durinya na ni.

¹⁷ Yennu, n la nan a dudukit ŋan bonchiann ki turin, ki bia yab bonchiann.

¹⁸ Mi-i kan a dudukit, li sii yab ki gar tanbiinii. Mi-i fiir gɔɔn ni, n be a boore.

¹⁹ Yennu, n sunman ki a kpii biitdamm nawa. N sunman ki nikpiirit na yaat n boora.

²⁰ Bi piak biite ki jiin a po, ki piak biir a sann.

²¹ Yennu, n ki loon binba ki loona na, ki bia yisin binba yêen a mɔb na bonchiann.

²² N namm nanmɔŋe, ki jikitib ki bi tee n datai.

²³ Yennu, fiitirin ki bann n yan ni, bikintin ki bann n dudukit nba tee.

²⁴ Gotir ki laan biit be nni-i, ki fan ŋmakitin manfokangbennuk sɔnu ni.