Joel 1 - Yennu Gbouŋ Mɔɔr

¹ Yennu mɔmaame na, ki u teen Joel, wunba tee Petuel bija na.

Ki jiin naasuut baaru po

² Yimm nba tee nikpera na, gbiintir man; wunba kur kɔɔ Juda tiŋ ni, gbiintir. Linba na booru ban tuma, laa tee i yoo, koo i yeejamm yoowa-a?

³ Want i waas li po man, ki bi mun saa wann bi waas, ki bi mun tan saa wann maaru nba waa.

⁴ Naasuut bonchiann saa baa bonbuburit paak. Naasuut nba liit ki nyik linba, binba wei tuu ŋmamire.

⁵ Fiit kii mɔ, yimm dayibira na; ii bui, yimm danyuura na. Lɔɔna nba ki bi ŋaa daan na biira.

⁶ Naasuut nba tee nan kunkɔnkɔnna nba yab bonchiann na lek ti doowa; bi mɔk paŋ ki yab kaa kann; ki bi nyana porin nan yanbɔr yar na.

⁷ Bi biir daan tilontiiwa, ki ŋman ti tilontlia. Bi ŋman kokir li wakawa, ki tan nyik li yiinii ki li peen.

⁸ Yimm niib na, ii bui man, nan sapaamɔ nba tuu bui fabin, jɔɔ nba ki u yaa wun kunɔ kuun biaŋinba na.

⁹ Jeet nan daan kaa ki bi saa tur Yennu, u ŋasaakak ni; ki mannteeb na bui fabin, kimaan Yenpiinii kaa ki teen Yennu.

¹⁰ Ki kpaant dɔɔ yann, ki tiŋ bui fabin, kimaan jeet na biira, ki daan tiinii na koor, ki kpan tiinii na suur.

¹¹ Ii mɔk parbiir man, yimm kpaara; ii bui fabin, yimm nba gorii tilontii kpaant, kimaan boroboro dii nan mukirii nan bonbuburit nba be i kpaant ni biira.

¹² Li daan tiinii nan kinkanii na suura, li tilontii kur suur ki kpowa, ki niib na parpeenn gbenn.

¹³ Ii lia bɔtoliant kii mɔ man, yimm nba tee mannteeb ki tuun maruŋ binbintir boor na. Saant Yenjiantu Ŋasaakak ni, ki bui fabin nyɔtunmunn. Jeet nan daan kaa ki i saa tur Yennu.

¹⁴ Turin mɔb ki bin lor mɔi, yiint ki taan niib na. Taant saakab na nan Juda teeb na kur ki bin baar i Yomdaanɔ Yennu ŋasaakak na ni, ki fabin turɔ.

¹⁵ Yennu daar na pera, ki tee daar nba ki Yabint daanɔ maŋ saa baar nan biiru. Daar maŋ sii tee bonbilankante.

¹⁶ Ti goriie, ki ti jeet biir, ŋaan ki ti kan fit teen siari. Parpeenn kaa Yenjiantu Ŋasaakak na ni.

¹⁷ Ki bonboorii kpenn tinkooŋ ni. Ki jeet kaa ki ti saa bekiri. Ki boa be koont ki yeer yeer.

¹⁸ Ki nei mɔ lin nan parbiir, ki peburuŋ mun bia di wahala, kimaan mɔɔt kaa ki bi saa ŋman.

¹⁹ Ki n fabin tur fin Yennu, kimaan bonkobit kpinkpaar boa nan tiinii kur koora, ki tee nan muue diir na.

²⁰ Ki muuk ni bonkobit na gbaa mɔ ki teen fin Yennu, kimaan kpenii na fɔɔra.