Barjokit 5 - Yennu Gbouŋ Mɔɔr

Kpaanii ki jiin bonchonchonsin po

¹ N bija, gbiintir, ki gbat n yanfoon nan n ninyentir mɔbona na.

² Ŋanne ki a saa bann faa sii be fanu biaŋinba, ki a mɔmaan sii want faa mɔk bannu biaŋinba.

³ A jalɔɔ ŋaapoo mɔb man nan siat nae, ki u pinpakit ban nan kpan na,

⁴ ŋaan li joontu tuu tan tee bontonne nan gbananyekitir.

⁵ Poo maŋe saa jiia ki saan nana kpeentiŋ; sɔnu nba ki u tɔk na tee kuun sɔnue.

⁶ U ki be manfoor sɔnjouk ni, u yiribe ŋaan ki mi nna.

⁷ Mɔtana, gbiintir n maan na, n ŋaajab, ki daa tammit linba ki n yeeni na.

⁸ Bɔkitir a mɔŋ nan li poo booru. A lek daa nakii u tammɔb boori.

⁹ Li-i tee ki a tun nna, a leebe saa gaar baakir nba ki a mɔk na, ki binba ki mɔk ninbatinu na saa kpia, ŋaan ki a daa tee bonbik.

¹⁰ Nigamme saa jii a mɔkint kur, ki faa daan tun linba na ji sii tee sɔɔ yar.

¹¹ A sii dɔɔ a kuun dɔɔnu paake ki kurii, ki a gbanant fɔɔt.

¹² Ki a ji saa yet a, “Bee ki n din ki tumii yami? Bee ki n din ki gaar kpaanii?

¹³ N daan ki gbiint n wannteeb maami. N daan ki gbat turibi,

¹⁴ ki n la ki n dii fei yiama, paanu ni.”

¹⁵ Ŋaant ki a numm n gboo a mɔŋ ŋaapoo, turin ŋɔɔ kuukɔɔe a lomm.

¹⁶ Fi-i dɔɔ nan poogamm ki maar waas, waas maŋ kan somma siari.

¹⁷ A ŋaapoo waas-i kpaat, bi saa somm fine, ŋaan li ki tee nigamm kaa.

¹⁸ Li paak, ii mɔk parpeenn nan parmaasir nan a ŋaapoo nba ki a kɔɔnɔ na.

¹⁹ U fant nan u ŋmaatir tee nan piarɔ yar nae; ŋaant ki u ningorsin n tura parpeenn; ŋaant ki u lomm na n linta.

²⁰ N bija, bee ki a saa jii a lomm ki tur pooganɔ? Bee ki a numm saa gboo a lɔɔ ŋaapoo fanti?

²¹ Yennu laat faa tuun linba kur. Siaminba kur ki a saan, ŋaan Yennu goriiae.

²² Tondaanɔ toonbiit tee baruko. U mɔŋ toonbiite tuu ŋmat soorɔ nan laauŋ na.

²³ U tuu kpoe, kimaan u ki mi u mɔŋ dianu. U liinsime saa jiiu ki saan nanɔ kaauk ni.