Barjokit 22 - Yennu Gbouŋ Mɔɔr

¹ Bi-i senn sanŋann nan mɔkint ki yaa a gann, fan gann sanŋann.

² Mɔkitɔɔ nan nandaanɔ kur, ŋaan Yennu-e namm.

³ Subindamme tuu dɔŋ bann nan daamii baat ki bin gɔɔrir, ŋaan wunba ki dukii ŋarin tuu kpan somme ki saa kɔɔ leŋ, ki tan bui kɔɔŋaan li poor po.

⁴ Sakin Yennu mɔb, ki sikin a mɔŋ, ki a saa la mɔkint nan baakir nan manfofoouk.

⁵ Fi-i loon a manfoor, fan lɔkit barit nba so biit damm na.

⁶ Want waas baa sii be biaŋinba, ki bi-i kpaat ŋaan bi kan tammir.

⁷ Nandamm tee mɔkita daabae. Fi-i kpent likirii, a teen wunba kpenta na daabire na.

⁸ Fi-i bur biit, ninbɔŋe saa pia, ki faa tuu dint a leeb biak nba na saa gbenn.

⁹ Ŋaant ki a nuu-ii yaa, kii piin nandamm jeet, ki a saa la piisin li paak.

¹⁰ Nyint dont-n-mɔŋ daanɔ i sinsuuk ni, ki mɔniɔk nan kunkɔna nan sanbiiuk saa gbenn.

¹¹ Fi-i tee popeenn daanɔ ki bia piak linba ŋan, bat sii tee a yɔɔke.

¹² Yennu saa yêt faak damm mɔbona na, ki barmɔnii n la nyannu.

¹³ Gbannyakdamm tuu kar bi ŋei niŋe, ŋaan yeen a bi kan nyi nanyer po, ki yanbɔr n tan mann sooribi.

¹⁴ Bonchonchonsin tee baruko ki so binba dont Yennu wutoor na.

¹⁵ Li tee waas binbeŋe nan bii tuun jatii, ŋaan fi-i kɔɔn lanbann bi pagbina po, bi saa nyike.

¹⁶ Fi-i piin mɔkita piinii, koo ki fiar tatimm a fan mɔkit, see namu soora.

Ki jiin yanbarii piintaa na po

¹⁷ Gbiintir, ki n tumiia yandamm nba yet linba. Tumiin bi wannu maŋ,

¹⁸ ki a sii mɔk parpeenn, li-i tee ki a tuu fit tiar linba ki bi yet na.

¹⁹ N loon ki a wei Yennu-e nan a par kur; li paak ki n yaa n beta li po mɔtana.

²⁰ N sɔb yanbarii piintaa ki tura; ki barii maŋ mɔk bannu nan kpaanŋanii,

²¹ ki li saa wanna barmɔnii nba tee linba. Ki bi-i ji kii tuma a fan lon barmɔnii, a saa jen nan gatu nba tooke. -- 1 --

²² A daa ŋmaab nandamm kimaan baa namii na paaki; a bia daa ŋmaab binba see barbuut boor ki ki mɔk sommitɔɔ.

²³ Yennu saa bu bi barii ki turib, ŋaan biir daanɔ nba dukin a wun biir bi manfoa na. -- 2 --

²⁴ Niib nba tee wutobiit damm na, a daa sob yɔɔsi;

²⁵ ki a tan saa mann gaar bi binbeŋ ki ji gbar lebitu. -- 3 --

²⁶ A daa saak nan a saa gaar sɔɔ pann ki pa turɔ.

²⁷ Fi-i tan gbar pann na panu, bi saa jii nan a dɔɔnuewa, ki yaat nann. -- 4 --

²⁸ A daa ban chari kpaterik nba ki a yeejamm din bir na. -- 5 --

²⁹ Wantin daanɔ nba tuun fanu, ki n saa wanna nan u ŋan gar niib bonchiann, ki jaŋ nan wuu be kpanbara tɔɔnn. -- 6 --