Aisaya 52 - Yennu Gbouŋ Mɔɔr

Biaŋinba ki Yennu saa tinn Jerusalem

¹ Jerusalem, a ŋamm kii mɔk paŋ kii paar. Yennu kasii digbann, a lia baakir. Binba ki mi Yennu ki bia ki yeen na ji kan ban kɔɔ a ni.

² Jerusalem, yokin a mɔŋ, ki yent a mɔŋ. Fiit tiŋ ni ki kar a naan gbant paak. Cheet bant nba ki bi baana na, yimm Sayɔnn teeb nba be yommisin ni na.

³ Ki Yabint Yennu yet u niib a, “Yaa din teen daaba, bi din ki pa likirii i paaki; li paak, siar kan pa kaawa ki bin ŋaai.

⁴ Yaa din saan kar Ijipt ki tee boorganu na, i din saan i yanbɔɔte, ŋaan Asiria din tan jii-i nan ninmɔnne ki yaat nani, ki bia ki pa siar i paaki.

⁵ Ki Babilonn tiŋ ni, li boorue bia tun na. I tee yommiie, bi ki pa siar i paaki. Binba dia-i na dont bi mɔŋe, ki faa kpinkpant ki ki gorii gbootin.

⁶ Yoo baate ki i tan saa bann nan mine tee Yennu ki pak turi.”

⁷ Li fan bonchiann nan ki a la toomii ki u nyii kunkona paak, ki baat nan labamann, ki li tee parmaasir barŋanii. U mɔɔntir nyannue ki piak Sayɔnn a, “A Yennu-e tee kpanbar.”

⁸ Binba guu doo maŋ na lakin hoot parmaasir hootiie. Bi fit laat nan bi tiɔŋ ninbina biaŋinba ki Yennu jent Sayɔnn.

⁹ Yimm Jerusalem langbent, ii hoot parpeenn po man. Yennu saa tinn u doo, ki maan u niib para.

¹⁰ Yennu saa jii u kasii paŋ na ki tinn u niib, ki durinya niib kur saa lar.

¹¹ Yimm nba jii jiantu diiuk bona na, ii yabir ki nyi Babilonn. I daa siit linba tee kɔɔr bont; ii teen i mɔŋ kasii, kii nyi.

¹² Yoo nba na, li ki tee i saa nyi kpirik kaa, i kii koor a yin mir boti. I Yomdaanɔ Yennu-e saa gar i tɔɔnn, ki guuri li munn po.

Ki jiin toontunnɔ nba di biak na po

¹³ Ki Yennu yet a, “N toontunnɔ saa la nyannu u toona niwa, u saa la baakir bonchiann.

¹⁴ Niib bonchiann nba din lau, bi gbanant din jeke; bi din biir u gbanant bonchiann ki u ji ki naan nirɔ.

¹⁵ Ŋaan mɔtana li saa yaar lit digbana bonchiann u paak, ki li saa teen kpanbara bakitnauŋ, ki bin muu mɔi. Baa ki ban la linba, ŋaan bi tan saa lar, ki bia bannir.”