2 Samuel 22 - Yennu Gbouŋ Mɔɔr

Ki jiin Defid nyannu yaŋ po

¹ Yennu nba din tinn Defid ki u nyii Sɔɔl nan u datalei nuu ni yoo nba, Defid din yin yaŋ nae ki tur Yennu a:

² Yennu-e tee n guutɔɔ, ki tee n sommtɔɔ nan fat-tɔɔ.

³ Yennu-e tee n guutɔɔ, u nie ki n la fatu; u guun nan naagbankɔŋir nae, u fiarin ki tintin. Ŋɔɔe tee n tinntɔɔ, u guun ki nyintin bonbiir ni.

⁴ N tuu yiin Yennu nba ŋan nan dontir nae, ki u nyintin datai nuu ni.

⁵ Kuun fuunn lintima, ki biiru dɔk be n paak.

⁶ Kuun daŋ kaane ki lintin; ki kaauk pii u baruk ki guun.

⁷ Maa tuu be parbiir ni, n tuu boi Yennu-e sommir po. U be u ŋasaakak nie ki gbat n kunkɔr, ki gbiint n mɔnii nba jiin sommir po na.

⁸ Yennu din donn wutoore, ki tingbouŋ na damm ki jekir, ki sanpaak bia damm, ki jekir.

⁹ Munyuuk din nyii u miana nie, ki muyeruk di mupeenu ki nyi u mɔb ni.

¹⁰ U din pat sanpagbouŋo ki sik, ki bunbɔncheenn be u taa po.

¹¹ U din be bona nba mɔk kpinkpant paake, ki li yukir yiama, ki wonpaaruk saan nanɔ.

¹² U din jii bunbɔnne ki dɔkin u mɔŋ, ki sanpagbounbɔnn nba gbee nan nyun lintɔ.

¹³ Ki mupeenu nyi sanyikintii nba be u tɔɔnn po na ni.

¹⁴ Yennu din tant Yendɔuŋ ni, ki ti gbat Yabint Daanɔ maŋ kunkɔr.

¹⁵ U tɔ u peenii ki yat u datai, ki jii sanyikitii ki yatib.

¹⁶ Ki mɔkgbeŋir tiŋ po ji dɔɔ yann, ki tingbouŋ na fiakir nyɔɔnt, yoo nba ki Yennu yakii nan u datai ki tantir bi paak nan wutoor na.

¹⁷ Yennu tant u nii ki sikin ki nyinnin nyunsunsuŋ ni.

¹⁸ U fatin n datai nba paar nan binba namin, ki bi paŋ garin na nuu ni.

¹⁹ Daar nba ki n be parbiir ni na ki bi worin, ŋaan Yennu-e din guurin.

²⁰ Yennu din sommime, ki n nyii ninbɔŋ ni, u din tinnin, kimaan u par mei n paak.

²¹ Yennu teenin paatii, kimaan n tuun linba ŋan. U teenin piisin, kimaan n ki mɔk bisiati.

²² N din mɔk mɔsaku nan Yennu sennii, ki ki tun bonbiir ki turɔ.

²³ N sak ki wei u sennii na kurawa. N ki yêt u wannu na.

²⁴ U mi nan n ki mɔk bisiat u boori, ki soor n mɔŋ ki ki tun biiti.

²⁵ Yennu pan paatii, n par nba yeen na paak, kimaan u mi nan n ki mɔk bisiat u boor.

²⁶ Yennu, a loon binba loona nae, ki tuun ŋant ki teen binba kaa biit na.

²⁷ A ŋan ki tur binba para yeen, ŋaan kɔn nan biit damm.

²⁸ A tuu tinn damm nba sikin bi mɔŋe, ŋaan sikint damm nba donn bi mɔŋ.

²⁹ Yennu, fine tee n fitir, ki te bunbɔnn kpantir yentu ki teenin.

³⁰ Fine teenin paŋ, ki n tuu lek n datai, ki teenin yiikoo, ki n tuu nyann bi paŋ.

³¹ Yennu ŋarin, u sɔnu ŋane, ki u mɔmaan tee barmɔnii, u tee nan naagbankɔŋir nae ki tur binba kpaanɔ sommir po.

³² Yennu kɔɔe tee Yomdaanɔ, Yennu kɔɔe tee ti guutɔɔ.

³³ Yennu-e teenin paŋ, ki te ki n sɔnu ŋan.

³⁴ U te ki n tiin fanu nan piarɔ na, u guun fanu, kunkona nba fɔk na paak.

³⁵ U tumiin maa saa kɔn biaŋinba, ki n saa fit tɔ kut tɔrbann.

³⁶ Yennu, fine guun ki tuu tinnin; a sommire teenin nijaann.

³⁷ Fine guun, ki bi ki fit nyannimi, ki te ki n ki ŋat baa.

³⁸ N wei ber n datai ki nyannib, ki n ki nyikitib nan maa tuu tan biirib,

³⁹ N faa ki biribe tiŋ ni, ki bi ji kan fit fiir, ki n nyannib, ki bi dɔɔ n tɔɔnn.

⁴⁰ Fine turin paŋ nba ki n kɔn kɔnn na, ki te ki n nyann n datai na.

⁴¹ Fine te ki n datai na chiar ki nyikin ki n biir binba namin na.

⁴² Ki bi yikin ki loon sommir, ŋaan sɔɔ kaa ki saa fatib, ki bi yi Yennu, ŋaan ki u ki teemm gatu.

⁴³ Ki n nannib ki bi tan tee nan tanbiinii na; ki n ŋmaat bi paak nan sɔnjouk ni tant na.

⁴⁴ Fine fat nyinnin niib nba lekin na nuu ni, ki ŋamm ŋmakitin, ki n dia n niib, ki niib nba ki n ki mib na kpant n jiamm.

⁴⁵ Ki boorganu gbaa n tɔɔnn; bi-i gbat n kunkɔr, ki bi saak n mɔb.

⁴⁶ Bi yan put ŋmate ki bi nyi bi digbanpaara ni, ki baat ŋaan jekir.

⁴⁷ Yennu fo. Pakin n fat-tɔɔ Yennu, ki mɔɔnt ŋɔɔ nba paar ki tinnin na po.

⁴⁸ Yennu-e te ki n nyann n datai, ki sikin niib na kur, ki bi be n lɔŋ ni.

⁴⁹ Yennu-e nyintin n datai nuu ni, ki te ki n paar n datai, ki guun, ki n nyi biit damm nuu ni.

⁵⁰ Li paak, n saa pak u sanne, niib sinsuuk ni, n saa yin yaniie ki pak u sann.

⁵¹ Yennu-e teen min kpanbar Defid nyannjaann, ki jikit u lomm nba kaa paak na, ki teen min nba ki u gannin na, nan n yaaboona, ki saa tuu yoo nba kaa paak.