Toona 9 - Yennu Gbounpaauŋ Mɔɔr

Biaŋinba ki Sɔɔl teen Yisaweirɔ

¹ Tɔn, Sɔɔl lek bia din fɔɔ kɔnfɔɔt, ki yeen a u sii dint ti Yomdaanɔ Yisa poorpoweiteeb biak, ŋaan kpib; ki tan saan Yennu jiantu yudaanɔ boor ni,

² a wun gaar kadaat, a ki saan Damaskus ki saa wann Yenjiantu diit yudamm, a wu sii la wunba waa Yisa sɔnu maŋ, jɔɔ amii poo, see wun soorib ki lorib ki jen namm Jerusalem.

³ Tɔn, wa ji din saa yoonbae ki saa per Damaskus, ki yentu nyii sanpaapo, ki sik yent lintɔ.

⁴ Ki u baa tiŋ ni, ki gbat ki kunkɔr yiu a “Sɔɔl, Sɔɔl, bee ki a mukisirimi?”

⁵ Ki u boi a “N Yomdaanɔ, ŋmee?” Ki kunkɔr na jiin a “Min Yisae, ki a mukisirin.

⁶ Ŋaan fiit ki saan doo na ni, ki bi sa saa beta fa ji sa teen biaŋinba.”

⁷ Li yoo na, jab nba din chiant Sɔɔl na ji biar set surimm. Bi din gbia kunkɔr na ŋarin, ŋaan ki laat sɔɔ.

⁸ Ki Sɔɔl tan fiir tiŋ ni, ki munt u nunii, ŋaan ki laati. Ŋanne ki bi dat u nuu ki saan nanɔ Damaskus.

⁹ Damunjaa ŋanntaa ki u ki fit laati. Li daa maŋ ni u din ki dii amii ki nyuu siari.

¹⁰ Ki Yisaweisɔɔ din be Damaskus maŋ, ki u sann yi Ananias, ki ti Yomdaanɔ yiinɔ yerintu ni a “Ananias!” Ki u jiin a “Mine na, n Yomdaanɔ.”

¹¹ Ki ti Yomdaanɔ yetɔ a “Fiit ki saan tɔkin sɔnu nba yi Sɔnsun-sonn na ki saa kɔɔ Judas ŋaak ni, ki boi jɔɔ nba nyii Tasus ki u sann yi Sɔɔl na po. U mei Yennue mɔtana,

¹² ki u la jasɔɔ yerintu ni, ki u sann yi Ananias, ki u kɔɔ ki jii u nii ki yii u paak, a wuu jikii laat.”

¹³ Ki Ananias jiin a “N Yomdaanɔ, niib bonchianne piak jɔɔ na po, ki jikit saa biaŋinba kur ki u tuun a mɔŋ niib Jerusalem.

¹⁴ U daan gaar yikoo jiantu yudamm boor ni, ki baar nna, a wun soor wunba kur yi a sann.”

¹⁵ Ki ti Yomdaanɔ betɔ a “Fini saawa! a ŋɔɔe tee wunba ki n gannɔ a wuu tuun n toonn, ki te ki boorganu nan bi kpanbara nan Israel teeb-n bann n sann,

¹⁶ ki n mɔŋ sa wannɔ muksuk nba kur ki u sa di n paak.”

¹⁷ Ŋanne ki Ananias saan kɔɔ ŋaak na ni, ki yii u nii Sɔɔl paak, ŋaan yetɔ a “N naa bik Sɔɔl, n Yomdaanɔ Yisae tumin. Ŋɔɔe tee daanɔ nba ki a daan baat nna ki tan lau sɔnu paak na, ki u tumin a n tan te ki a-ii jikii laat, ki bia gbee yent nan Yennu Seyeeŋ.”

¹⁸ Li taakpaak ni ki siar tabit u ninbina ni ki baa, ki naan nan janwɔka na, ki u ji laat jik, ki fiir set; ki bi wurɔ Yennu nyunwuru.

¹⁹ Ŋanne ki u dii jeet ki paŋ jen. Li yoo na ki Sɔɔl din lakin be nan Yisaweira kaman nan daa ŋannlee na Damaskus,

Biaŋinba ki Sɔɔl mɔɔntir Yisa barŋanii

²⁰ ki din saan yiama Yenjiantu diit ni, ki mɔɔntir Yisa po, a Yisa kpan set tee Yennu Bijae.

²¹ Binba kur din gbat u mɔɔntii maŋ, li din teemm yaarlituko, ki bi boi a “Jɔɔ na kaa daan kpi binba yi Yisa sann Jerusalem na-aa? U yaan ki baar a wun soor ki lor Yisaweira, ki ŋmat namm ki saa turib Yennu jiantu yudamm kaa na-aa?”

²² Ŋaan ki Sɔɔl mɔɔntii maŋ bia lek ŋammit ki pukii nan Yennu paŋ, ki u maan maŋ want nan Yisae set tee Yennu Niganntɔɔ Masia ki birsuk kaa; ki Juu teeb nba be Damaskus na ki fit jiinɔ siari.

²³ Ki daa bonchiann tan gar, ki Juu teeb na lakin leeb ki lor lor a bin kpi Sɔɔl,

²⁴ ki yennu nan nyiɔk ki bi guu doo maŋ tammɔi bonŋann a bin kpiu. Ki sɔɔ tan kumiiɔ ba lorin u paak biaŋinba;

²⁵ ŋaan nyayouŋ ki u weinanleeb tan jiiu ki teenɔ chibuk ni, ki nyinnɔ doo maŋ joonfɔnn ni, ki sikinɔ tiŋ ni.

Sɔɔl benu Jerusalem

²⁶ Ŋanne ki Sɔɔl din saan Jerusalem ki saa yabir u mɔŋ paak a wun lakin nan Yisaweira na, ŋaan ki bi ki teenɔ yada nan u ji tee Yisaweirɔe, ki tiinɔ jaŋmaanii.

²⁷ Ki Banabas din tan baar u sommir, ki jiiu ki baar nanɔ toomiinba na boor ni, ki kat wannib biaŋinba ki Sɔɔl daan la ti Yomdaanɔ Yisa sɔnu ni, nan wa pak nanɔ biaŋinba. U bia din ŋamm ki wannib Sɔɔl nba din mɔɔntir Yisa po nan parcheenn Damaskus biaŋinba.

²⁸ Banabas nba wannib linba na, ki Sɔɔl din lakin be namm, ki bi din kak ki lin Jerusalem kur po, ki mɔɔntir ti Yomdaanɔ sann nan parcheenn.

²⁹ U bia din piak nan Juu teeb nba piak Griik maan na ki jikit saa Yisa po, ŋaan bi din nɔi nanɔ, ki koor a bin kpiu.

³⁰ Ŋaan yoo nba ki Yisaweira bann nna maŋ, ki bi jii Sɔɔl ki sik nanɔ Siisarea, ki te ki u kun Tasus.

³¹ Ŋanne ki Yisaweira nba be Judea nan Galilee nan Samaria na ji ki laat muksuku, ki ŋammit ki tumii ti Yomdaanɔ barii, ki tee yentina, ki Yennu Seyeeŋ be namm ki kɔɔntib para, ki bi pukii.

Biaŋinba ki Piita tuun bakitnauŋ toona

³² Li poorpoe ki Piita din yek lin siar kur po, ki bia din tan sik a wun gɔn Yennu niib nba be Lida na.

³³ Leŋe ki u din saa la jasɔɔ nna, ki u sann yi Eneas, ki u din poŋ tee gbanankpeenn daanɔe, ki din ki fit fi u dɔɔnu ni teee nan bina ŋanniin.

³⁴ Ki Piita tan yetɔ a “Eneas, a Yisa Masia te ki a paaka. Fiit ki ŋamm a dɔɔnu.” Li taakpaak ni ki u fiir.

³⁵ Lida nan Sharon doi niib kur nba din lau ki u paak na, ki bi lebit bi binbeŋ, ki waa ti Yomdaanɔ sɔnu.

³⁶ Poosɔɔ mun din be Jɔpa, ki u sann yi Tabita, ŋaan Griik maan ni, bi din yiu Dɔkas, ki li paak tee piarɔ. U din tee Yisaweirɔe, ki din tuun toonŋana bonchiann ki teen niib, ki bia din sommit talasdamm.

³⁷ Li yoo na dinn ki yiaru din soorɔ ki u kpo, ki bi din jiiu ki wurɔ, ŋaan jiiu doo nanɔ ditɔɔtuk ni ki birɔ.

³⁸ Jɔpa mun din ki fɔk nan Lida saami, ki Yisaweira nba din be Jɔpa din gbat nan Piita be Lida, ki bi tun jab bannlee u boor ni, a wun kakit ki baar yian yian na. Ki jab bannlee maŋ saan ki saa barin Piita.

³⁹ Ki u fiir ki bi jen nanɔ. Wa baar yoonba, ki bi jiiu ki doo nanɔ ditɔɔtuk maŋ ni. Ki pakɔi din be diiuk na ni, ki bi kur ŋaa lint Piitawa, ŋaan mɔ, ki jikit bi liata nan bi chinchena ki wantɔ, ki yeen a “Dɔkas nba tuu be u manfoor ni ki nyar linba ki teente na.”

⁴⁰ Ŋanne ki Piita nyinn bi kura diiuk na ni, ŋaan gbaan tiŋ ni, ki miar Yennu, ŋaan tan ŋmant kpeemɔ na paak, ki yiin a “Tabita, fiit!” Ki u munt u nunii ki la Piita, ki ji fiir ki kar.

⁴¹ Ki Piita dɔnn ki soor u nuu ki fiin sennɔ, ŋaan yiin Yennu niib nan pakɔi na, ki tan jiiu ki wannib nan u jen u manfoor niwa.

⁴² Ki li labaar din yat saan Jɔpa kur po; ki niib bonchiann din teen ti Yomdaanɔ Yisa yada ki waa u sɔnu.

⁴³ Ki Piita ji din biar be Jɔpa daa bonchiann; u din be jasɔɔ nba tee gbanfebirtɔɔ na ŋaak nie, ki bi yiu Simon.