Toona 8 - Yennu Gbounpaauŋ Mɔɔr

Biaŋinba ki Sɔɔl din mukisir Yisaweira

¹ Ki Sɔɔl din sak ba din yaa bin kpiu na po. Li daar maŋe ki muksubiir din baar Yisaweira nba din be Jerusalem na paak; ki bi kura din nyii yat ki saan Judea nan Samaria yaka po, ŋaan nyik toomiinba na kuukɔɔ leŋ.

² Ki yentinsiab din jii Stiifen, ki saan saa piiu, ŋaan mɔ yikin ki fabin bonchiann u paak.

³ Ki Sɔɔl ŋarin din loon wun biir Yisaweirae, ki din lin kɔɔ ŋaak ŋaak, ki so Yisaweira, jab nan poob, ki nyintib ki saa kɔɔntib dansarii.

Biaŋinba ki Filip mɔɔntir Yisa barŋanii Samaria

⁴ Yisaweira nba din nyii ki yat na ji din saa lokir kur poe ki mɔɔntir Yisa maan maŋ;

⁵ ki Filip nyii ki sik Samaria doo ni, ki saa mɔɔnt Yennu Niganntɔɔ Masia po ki tur leŋ niib.

^6-7 Ki nigbouŋ na mun din tikir ki gbiint Filip mɔɔntii maŋ, ki bia la nan u bakitnauŋ toona nba ki u tuun; u din nyinn narinbiit niib bonchiann ni, ki bi yikin sanpaapo ki nyii; ki u bia te ki gbanankpeena damm nan wɔbii bonchiann paak. Li paak din teen ki bi mantik gbiintir u maan fanu nan dudukyent.

⁸ Ki parpeenn din be doo maŋ ni bonchiann.

⁹ Jasɔɔ nna mun din be doo maŋ ni, ki tee nyɔkluurɔ, ki u sann din yi Simon, ki yosau ki u tuu tan tee u bakitnauŋ toona, ki li din bakitir niib kur nba be doo maŋ yakir po, ki u din yi u mɔŋ a u tee nijaanne.

¹⁰ Niib kur nba din tee nijaana nan tarii din baakitɔ, ki bi din tuu yaa a “Jɔɔ na mɔk paŋ nba nyii Yennu boore.” Li paak ki bi yiu Panchiauŋ Daanɔ.

¹¹ U din tuu tee u bakitnauŋ toona maŋ, ki li bakitirib ki yukira. Li paak ki bi din teeu nibaakir ki bia gbiintir u maan.

¹² Ŋaan ki Filip nba din tan baar ki mɔɔntir Yennu naan barŋanii nan Yisa sann po na, jab nan poob din sak u mɔɔntii maŋ, ki u wurib Yennu nyunwuru.

¹³ Simon mɔŋ mun din teen Filip maan yada, ki u wurɔ. Ki u teen Filip weinanlɔɔ, ki laat bakitnauŋ toonjaana nba ki u tuun na, ki li tuu yaar ŋaan litɔ.

¹⁴ Ki Yisa toomiinba nba din be Jerusalem gbat a Samaria teeb gaar Yennu maan maŋ; ki bi din tun Piita nan Jɔɔnn,

¹⁵ ki bi sik Samaria ki saa miar Yennu bi paak, a bin gaar Yennu Seyeeŋ,

¹⁶ kimaan Yennu Seyeeŋ maŋ daa din ki sik bi sɔɔ ni. Bi kpan din wurib Yennu nyunwuru nan ti Yomdaanɔ Yisa sann ni kuukɔɔe.

¹⁷ Ki Piita nan Jɔɔnn yii bi nii bi paak, ki bi gaar Yennu Seyeeŋ.

¹⁸ Simon nba din la ki toomiinba na nba yiin bi nii niib paak, ki Yennu turib Seyeeŋ na, ki u yaa a wun tur toomiinba na likirii,

¹⁹ ŋaan yetib a “Chabimin mun yikoo na man, ki n mun tuu yii n nii sɔɔ paak, ki wun gaar Seyeeŋ maŋ.”

²⁰ Ŋaan ki Piita betɔ yaa a “A sa kpo yiake nan a likirii maŋ, kimaan a dukii mi a a sa gaar Yennu piinii nan likiriie.

²¹ Li paak na, a lek kan tun siar ti toonn na ni, kimaan a par ki be fanu nan Yennu.

²² Li paak, i mɔk parbiir nan a dudukbiit na, ki lebit a sɔnii ŋaan kii mei Yennu; li pasiari u sa nyik chaba nan a dudukbiit maŋ,

²³ kimaan n la nan a gbee nan nɔɔntonte, ki bia tee biit yommike.”

²⁴ Ki Simon jiin betib a “Miat i Yomdaanɔ ki turin man, ki linba ki i yet na, ki li ji daa baat n paaki.”

²⁵ Tɔn, li poorpoe ki Piita nan Jɔɔnn din pak siara ti Yomdaanɔ po ki tur niib, ki bia mɔɔnt u maan, ŋaan ŋmat ki saan Jerusalem. Ba din saa nee, ki bi din mɔɔntir Yisa barŋanii Samaria digbanbis ni bonchiann.

Filip nan Etiopia jatɔɔkir po

²⁶ Ŋanne ki ti Yomdaanɔ malaka tan baar bet Filip a “Fiit saan tɔkin sɔnu nba nyi Jerusalem ki siik Gasa na.” Leŋ din tee tinpere.

^27-28 Ki Filip fiir ki saan. Tɔn, ki Etiopia jatɔɔkir nna mun din nyii u sɔnu ki kun. Jɔɔ maŋ din tee nijaann nba tee Etiopia poobat nba ki bi yiu Kandes na likirii karachinba yudaanɔe. U din saan Jerusaleme, a wun saa jiant Yennu, ki din tan ŋmat ki kun, ki kar u toruk ni, ki taanii daarɔ. Wa din kar ki saa yoonba, ki u karin Yennu sɔkinii Aisaya gbouŋ ni.

²⁹ Ki Yennu Seyeeŋ yet Filip a “I saa nakin toruk na.”

³⁰ Ki u chiar saan nakin leŋ, ki gbat ki u karin Yennu sɔkinii Aisaya gbouŋ ni. Ki u boiɔ a “A bann linba ki a karin na paakii?”

³¹ Ki u jiin a “Nlee ki n sa bann li paaki, ki li ki tee ki sɔɔ wannin kaa?” ŋaan barin Filip a wun kɔɔ wannɔ. Ki u kɔɔ toruk maŋ ni ki bi lakin kar.

³² Yennu gbouŋ maan nba ki jatɔɔkir maŋ din karin na, ŋannii na a “Ki u sak saan kaman nan peeuk na ki bi daarɔ a bin saa kpiu. a ki u ŋmin kaman nan pebik nba ki bi tuu pot pot u kobit ki u ŋmin na, a ki u ki yaat u mɔbi,

³³ a ki bi sikin u baakir ki yêt bin bu u buut bonŋann, a u din ki mɔk yaaboona, a kimaan u manfoor ji jit tingbouŋ na niwa.”

³⁴ Ki jatɔɔkir na boi Filip a “Betirin, ŋmee ki sɔkinii na yeen na? U yeen u mɔŋ amii sɔɔe?”

³⁵ Ki Filip piin siaminba ki jatɔɔkir maŋ karin na ki saa, ki piak Yisa barŋanii.

³⁶ Ba tɔk sɔnu maŋ ki siik yoonba, ki bi la nyun nna dɔɔ. Ki jatɔɔkir na yetɔ a “Gotir, nyume na. A bee yaa lin teen ki a kan wurin Yennu nyunwuru?”

³⁷ Ki Filip yetɔ a “Li-i tee ki a teen Yisa yada nan a par kura, n sa wurawa.” Ki u jiin a “N teen yada nan Yisa Masia tee Yennu Bijae.”

³⁸ Ki jatɔɔkir maŋ te ki taanii na set, ki ŋɔɔ nan Filip sik nyun na ni, ki Filip wurɔ Yennu nyunwuru.

³⁹ Ki bi tan nyii nyun na ni ki doo; ki Yennu Seyeeŋ jii Filip ki yaat nanɔ, ki jatɔɔkir na ji ki lau; ŋaan ŋamm soor u sɔnu ki kun nan parpeenn.

⁴⁰ Ki Filip ji din saa be Asotusewa, ki din lin digbana kur ki mɔɔntir Yisa barŋanii mɔkmɔk nan wa din tan baar Siisarea.