Toona 4 - Yennu Gbounpaauŋ Mɔɔr

Ba tikir Piita nan Jɔɔnn bartituk kaanu ni biaŋinba

¹ Yoo nba ki Piita nan Jɔɔnn daa din see ki piak teen niib maŋ na, ki Yennu jiantu ŋasaakak lanjimanba yudaanɔ nan Sajusiinba nan Yennu jiantu yudamm kpir baar Piita-nba boor ni,

² kimaan bi wutoa doo nan Piita nan Jɔɔnn, a bi want niib a Yisa daan fiir kuun ni paak, ki li want nan kpeemm tan sa fiir kuun ni ki jen bi manfoor ni biak.

³ Li paak ki bi soorib ki kɔɔmm dansarik a lin yenta, kimaan yoo poŋ gara.

⁴ Ŋaan ki niib bonchiann nba din gbat Piita maan maŋ teen Yisa yada ki teen Yisaweira. Ki jab nba teen u weira na kann din tee kaman nan tusa ŋaŋŋmu na.

⁵ La tan yent sanyiɔk ni, ki Juu teeb yudamm nan saakab nan sennu wannteeb lakin bi tituk kaanu ni Jersualem;

⁶ ki bi lakin nan Yennu jiantu yudaanɔ Annas, nan Kayafas, nan Jɔɔnn nan Aleksander nan jiantu yudaanɔ maŋ ŋaatesiab,

⁷ ki te ki Piita nan Jɔɔnn fiir ki set bi sinsuuk ni, ŋaan ki bi boib a “Panboor bee ki i mɔki? Ki ŋmee sann nie ki i fiin wɔbik nba na?”

⁸ Ŋanne ki Yennu Seyeeŋ fiir Piita ni, ki u jiin ki yetib a “Yimm chanbaanba nan saakab, gbiintir man,

⁹ li-i tee ki i boit dinna na ki jikit saa toonŋann nba ki ti tun ki tur wɔbik na, nan wa la laafia na paakie,

¹⁰ ŋann li ŋan ki i kura-n bann, ki Israel teeb kur-n mun bann nan Nasaret nirɔ Yisa Masia sann paake ki jɔɔ maŋ la laafia ki see i numm ni na. Li Yisae ki i daan te ki bi kpaau dapunpunn paak ki kpiiu, ŋaan ki Yennu fiinɔ kuun ni na.

¹¹ Ŋɔɔe tee daanɔ nba ki Yennu gbouŋ piak u po na, a ‘Tann nba ki yimm tanmaara yêtɔ na, a ŋannii set tee lɔtik ni tanŋann.’

¹² Ki sɔɔ sann ji kaa tingbouŋ na ni ki Yennu tur niib a bin la tinnu, see Yisa kuukɔɔ.”

¹³ Tituk teeb maŋ nba din la Piita nan Jɔɔnn parcheenn nba ki bi mɔk na, ki bia bann nan Piita nan Jɔɔnn tee damm nba ki mi gbouŋ bonŋann na, li din yaar ŋaan litibe, ki bi ji bann nan bi tuu tee Yisa weinanleebe.

¹⁴ Ba la jɔɔ nba ki bi won te ki u paak na, ki u see Piita nan Jɔɔnn boor ni na, bi ji din ki mɔk mɔb nba sa pak ki biiribi.

¹⁵ Ŋanne ki bi din ŋaan ki bi daa nyii bi lakinu diiuk maŋ ni daann, ŋaan ki bi biar faa bi leeb labaar,

¹⁶ ki boi bi leeb, a “Ti sa teen jab na nlee na? kimaan sɔɔ kur nba be Jerusalem poŋ mi yaarlituk toonn nba ki bi tun maŋ na. Li paak nna ti ji kan fit nɔi;

¹⁷ ŋaan ŋaant man ki tin kpaamm kpaanii, ki bi ji daa mi ki yi Yisa sann ki teen niibi, ki Yisa maan maŋ ji daa bia yat ki saa niib ni.”

¹⁸ Ŋanne ki bi yiimm, ki bi jen kɔɔ diiuk na ni; ki bi betib a “I mi man ki i ji mi ki jii Yisa sann ni ki pak ki wann sɔɔ jik.”

¹⁹ Ki Piita nan Jɔɔnn jiin ki betib a “Ki i yaa mɔŋ mɔŋ po ŋarin, i dukin nan lanne tokin Yennu boor ni? ti ji sak i mɔb ŋaan nyik Yennu mɔb amii nlee?

²⁰ kimaan timm kan fit ki nyik pinpauk linba po ki ti la ki bia gbati.”

²¹ Ki tituk teeb maŋ lek kpaamm kpaanii nan nunmɔnjar, ŋaan ŋaab yann a bii saa, kimaan bi ki la sɔnsau nba ki bi sa dat bi tuba, kimaan niib na din piak ki dont Yennu sann nan ba din fiin wɔbik na paak.

²² Jɔɔ nba ki bi te ki u paak na bina din gar kaman nan binpiinna nawa.

Biaŋinba ki bi miar Yennu parcheenn po

²³ Ba ŋaa Piita nan Jɔɔnn yoonba, ki bi ŋmat kun bi leeb peŋ, ki saa yetib linba ki Yennu jiantu yudamm nan saakab maŋ pakib.

²⁴ Ba mun gbat nna maŋ ki bi kur taan leeb nan dudukyent kuukɔɔ, ki mei Yennu a “Ti Yabint Yomdaanɔ, fine din nan sanpaak nan tiŋ na, nan mɔkgbeŋŋa nan linba kur be leŋ,

²⁵ ki a Seyeeŋ maŋ nie ki a din wann ti yeja David wunba din tee a toontunnɔ, ki u din bunt buntir ki yet a ‘Binba ki tee Israel teeb na pir nan wutoa, ki Israel teeb lorin lor yanna,

²⁶ ki tingbouŋ na kpanbara nan yudamm taan leeb ki took a bin kɔn nan ti Yomdaanɔ Yennu nan u Niganntɔɔ Masia na.’

²⁷ “Li tee barmɔniie nan Herod nan Ponshus Pailat nan binba ki tee Israel teeb na nan Israel teeb daan set lakin doo na ni, ki lor lora a bin kpi a popeenn toontunnɔ Yisa, wunba ki a din gann ki sennɔ na.

²⁸ Ŋanne ki bi lakin, a bin tun linba kur ki a poŋ din dukin a yanbɔɔt ni nan a paŋ, ki yaa li tan sa teen na.

²⁹ Tɔn, mɔtana, ti Yomdaanɔ, gbiintir niib na nba fɔ kɔnfɔɔt nan nunmɔnn ti paak na, ki ŋaan ki timm nba tee a daaba na-ii piak a maan nan parcheenn bonchiann,

³⁰ ŋaan tant a nuu ki te ki baatib-n la paaku, ki ŋaan ki tii tuun bakitnauŋ toonjaana, nan a popeenn toontunnɔ Yisa sann paŋ ni.”

³¹ Ba gbenn Yenmiaru na yoonba, ki siaminba po ki bi tikir na ji jek, ki bi kura gbee yent nan Yennu Seyeeŋ, ki ji piin piak Yennu maan nan parcheenn.

Ba chentir bi bona ki teen leeb biaŋinba

³² Li yoo na ki Yisaweira maŋ kura taan leeb nan dudukyent kuukɔɔ, ki chentir bi bona ki teen bi leeb. Bi sɔɔ din ki yaa a u yen siar nan u mɔŋi.

³³ Li yoo na jik ki toomiinba maŋ din nyint ti Yomdaanɔ Yisa kuunfiiru siara, ki siara maŋ din mɔk paŋ bonchiann, ki Yennu sommir bonchiann din be bi kur ni.

³⁴ Ki linba na sɔɔ din kaa bi ni ki pɔt siari, kimaan binba din mɔk bi mɔŋ mɔŋ kpaant nan bi ŋei din tuu kɔie, ki gaar li likirii ki baar nann,

³⁵ ki tan teen toomiinba na, ki bi chentir ki teen bi leeb nan ba loon biaŋinba.

³⁶ Ki jasɔɔ din be leŋ ki u sann yi Josef, ki u din tee Liifai booru ni nirɔ, wunba ki bi din marɔ Saiprus, ki toomiinba na din yiu Banabas (ki li paak tee Sommtɔɔ na),

³⁷ ki u din tan kɔi u kpaab, ki gaar li likirii ki baar nann, ki tan tur toomiinba na.