Toona 27 - Yennu Gbounpaauŋ Mɔɔr

Pɔɔl nba piin Rom doo saanu biaŋinba

¹ Ba ji din tan dukin a bin ji Pɔɔl ki saan nanɔ Rom, Itali tiŋ ni, ki bi jii ŋɔɔ nan dansarkɔɔleeb, ki turib Rom lanjimanba saakɔɔ nna, ki u sann yi Julius, ki u be lanjimanba paabu nba ki bi yi Kpanbara Yudaanɔ Paabu na, ki u jii lanjimanba na,

² ki bi ji kɔɔ ŋaruŋ nba nyii Adramitium, kimaan ŋaruŋ maŋ poŋ teen siir nan wun nyi Siisarea ki saan Asia tiŋ ni doi nba kpia mɔkgbeŋŋir na kpiŋ; ki Masedonia nirɔ Aristakus, wunba din nyii Tesalonika na, nan min Luk mun bia din chian Pɔɔla.

³ Ki li tan yent sanyiɔk ni, ki ti baar Saidon. Ki lanjimanba saakɔɔ Julius din dia Pɔɔl fanu, ki din chabɔ a wun saan Yisaweira nba be leŋ na peŋ, ki bii teeu saantuk.

⁴ Ki ti tan nyii leŋ ki yaat saa, ki wouŋ fukit ki da tookit, ki ti pek kpian Saiprus tiŋ po ki saa, ki tiŋ maŋ tia wouŋ na ki turit.

⁵ Ta poot mɔkgbeŋŋir na yoonba na, ki ti tan per Silisia nan Pamfilia tinii po, ki ji baar Maira, Lisia tiŋ ni na.

⁶ Leŋe ki lanjimanba saakɔɔ na la ŋaruŋ nba nyii Aleksandria ki saa Itali tiŋ ni. Ki u te ki ti lɔɔr ki kɔɔ ŋaruŋ maŋ;

⁷ ki saa waan waaminna, ki li tan gbatit. Ti din jii daa saamewa, ki tan baar Kinidus, Kreet tiŋ ni. Ki wouŋ na bia lek ki nyik ki tin saan ta saa siaminba po na. Li paak ti din bɔkii, ki gaar Kreet tiŋ maŋ poe. Li po maŋe ki wouŋ din ki paari, ki ti tan kpian nan Salmone, Kreet tiŋ ni, ki gar.

⁸ Ta din saa na, li din paar bonchiann nan ta tan baar Kreet doo nba yi Setŋanu na. Leŋ din ki fɔk nan Lasea doo, Kreet tiŋ ni.

⁹ Ta baar yukir bonchiann na, Juu teeb mɔloru dagbeŋŋir ji din poŋ gara, ki yoo nba ki ninbɔŋ tuu tan baar mɔkgbeŋŋir paak na tan baar; li paak ki Pɔɔl kpaanib ki yetib a

¹⁰ “N yɔɔs, n mi nan ti sɔnu na ni, ninbɔŋ sa daamit bonchiann, ki li ki tee tiat nba be ŋaruŋ na ni, amii ŋaruŋ na kuukɔɔ paak kaa, ŋaan nan ti mɔŋ mɔŋ manfoa gbaa sii be ninbɔŋ maŋ ni.”

¹¹ Ŋaan lanjimanba saakɔɔ na baka din taan kaa nan linba ki Pɔɔl pak na po, ŋaan fiin ŋaruŋ na saakɔɔ nan li daanɔ na poe.

¹² Ŋaan ŋaruŋ maŋ nba din tuu see doo nba na din ki fan nan tin set leŋ fufuk yoo, li paak, bi bonchiann ji din yaa a bin ŋaan ki bin fiir leŋ ki saan, a li pasiar bi tan sa baar Fiiniks. Leŋ din tee Kreet tiŋ dooe, ki ŋaruŋ sinsee boor be leŋ ki took yenbaa po, ki bi loon bii be leŋ fufuk yoo.

Ninbɔŋ nba din be mɔkgbeŋŋir na ni labaar

¹³ Li yoo na ki bi la niigaŋ po na wouŋ ji da waan waaminna, ki bi ji dukin a li pasiar li sii tee wounŋaŋo, linba sa te ki bin fit nyann ba dukii biaŋinba, ki li yoo na, ki bi ji fiir ki dat kutkpiatir nba so ŋaruŋ ki sent na, ki kɔɔn ŋaruŋ maŋ ni, ki yaan jak bi sɔnu ki saa, ki bɔɔk Kreet mɔk-kpiŋ.

¹⁴ Li ki yukiri ki wonpaaruk nba nyi yonput po na fikit tiŋ na ni, ki da siik mɔkgbeŋŋir na ni,

¹⁵ ki tan baar wurrr ŋaruŋ na paak ki tutir, ki li ji paar bonchiann nan nirɔ-n ji fit kan ŋaruŋ maŋ ki kɔɔ wouŋ na ni; ki ti tat nyik wouŋ na ni kɔɔnu, ŋaan ki wouŋ na da ŋaruŋ maŋ ki saa nann jik,

¹⁶ ki li jiit, ki ti saa baar ki gar tinbik nba ki bi yi Kɔda na. Ta gaar kpiant yoonba ki tinbik maŋ gɔɔr wouŋ na ki u barik, ki ti ji gbaa gbaa saa gɔɔr burgbetir nba tuuk ŋaruŋ na paak na,

¹⁷ ki bi ji dat burgbetir na ki kɔɔnn ŋaruŋ na ni, ŋaan bia lor ŋaruŋ na nan ŋmiit kenkema ki lint. Bi din tiin jaŋmaanii, ki mi a bi tan sa mann kpet ki kpian Libia tiŋ ni, siaminba ki nyun ki sumii na. Leŋ din tee ninbɔŋ boore. Ŋanne ki bi sikin ŋaruŋ na chinchenn ki ji ŋaan ki wouŋ na yaan jiib ki saa namm.

¹⁸ Wonpaaruk nba mantik din da na, ki li yent sanyiɔk ni, ki bi piin ki nyinn bonkɔɔtkara ŋaruŋ maŋ ni,

¹⁹ ki li sanyafannuk jik, ki bi jii bi mɔŋ nii ki nyinn nyinn ŋaruŋ tiat nba be ŋaruŋ maŋ ni na, ki lu lu mɔkgbeŋŋir na ni.

²⁰ Li din jii daa bonchiann ki sanpagbana dɔkin sanpaapo, ki ti ki fit la yennu amii ŋmaabira gbaa, ki wouŋ na lek bia da nan paŋ. Ta din mɔk dindann ki dukii mi a ti sa tinn na, ki li kur nyii peb.

²¹ Li din yukir bonchiann ki bi ki dii, ki Pɔɔl tan fiir set ki yet a “N yɔɔs, i daaŋŋi bo-i sak n mɔb, li daan bo sii ŋan. I bo tan kii laat ninbɔŋ ki di fara na booru.

²² Ŋaan mɔtana, yii saak n mɔb kii mɔk parcheenn man. I sɔɔ nan yenɔ kuukɔɔwa kan kpo gbaa, nɔkira ŋaruŋ maŋe sa biir.

²³ Kimaan Yennu nba ki n tee u yɔɔ ki jiantirɔ na, u malaka won sik n paak nyiɔk na,

²⁴ ki tan betin a ‘Pɔɔl, daa tiin jaŋmaanii. See ki bi tan jiia ki saan nana kpanbara yudaanɔ Siisa na peŋ. A paak, ki Yennu yaa wun tinn niib kur nba be nana ŋaruŋ na ni.’

²⁵ “Li paak, n yɔɔs, i mɔk parcheenn man, kimaan n teen Yennu yada nan li kpan sii tee kaman nan wa betin nae.

²⁶ Ŋaan wouŋ lek sa tutit nan paŋ, ki daamit, ki te ki tin baar tinbisiak paak.”

²⁷ La din tan teen nyatummuna piik nan ŋanna yoonba, ki wouŋ na bia lek da ki saa nant mɔkgbeŋŋir nba ki bi yir Adria na paak, ki tansuunii ki ŋaruŋ kanna na ji dukii mi a ti per tiŋe.

²⁸ Ŋanne ki bi jii bonbikinkar, a bin bikin ki laan li sumii amii li ki sumii, ki bi ji bikin ki sɔɔ ki li sumii baar taapauŋ kobik nan piinnleewa. Ki li yann waaminna, ki bi yaan bikin, ki ji sɔɔ ki li ji sumii tee taapauŋ piinnyiae.

²⁹ Ki jaŋmaanii kɔɔb, kimaan bi dukii mi a bi ŋaruŋ na tan sa mann kpet ki do tana paak. Li paak, ki bi ji jii kutkpiata ŋanna nba so ŋaruŋ ki sent na, ki lu nyun ni, ki gaan gaan ŋaruŋ maŋ poorpo, ŋaan lek ji miar Yennu a lin yent sanyiɔk.

³⁰ Ŋanne ki ŋaruŋ kanna na ji loon bin bot ŋaan nyik ŋaruŋ na. Ki bi sikint burgbetir na nyun paak, ŋaan ji tee ser ki li tee kaman nan bi yaa bin sikin kutkpiata ŋaruŋ maŋ tɔɔnn poe na.

³¹ Ŋaan ki Pɔɔl yet lanjimanba saakɔɔ na nan lanjimanba maŋ a “Ŋaruŋ kanna na-i kaa ŋaruŋ na ni, i sɔɔ kan tinni.”

³² Ŋanne ki lanjimanba na pot pot ŋmiit nba ki bi lor lor burgbetir maŋ, ŋaan te ki li baa nyun ni.

³³ Tɔn, ki li yaan tan per yentu, ki Pɔɔl bet bi kura a bin di jeet, ki yet a “Dinna li pukii daa piik nan ŋannae na ki i mɔk jaŋmaanii ki daa ki dii siari.

³⁴ Li paak, n barimiie ki yi lek di jeet, kimaan li tee linba sa te ki i ŋamm la paŋe. I sɔɔ kan kpo fabaa.”

³⁵ Pɔɔl nba pak nna maŋ, ŋaan jii boroboro, ki tur Yennu niipoouk bi nunii ni, ŋaan ji ŋmit dii.

³⁶ Ŋanne ki bi para ji chee, ki bi kura jak jeet na ki di.

³⁷ Ti kura kann din tee niib kobiinnlee nan piinnlore nan bannloobo.

³⁸ Sɔɔ kur nba din dii jeet na ki jaŋ yoonba, ki bi jii boroboro na dii nba din tenn ŋaruŋ maŋ ni na ki lu mɔkgbeŋŋir na ni.

Ŋaruŋ na kɔnnu labaar

³⁹ La tan yent sanyiɔk, ki ŋaruŋ kanna na la tiŋ na, ki ji ki banni, ŋaan la lɔtuk nna mɔkgbeŋŋir na kpiŋ, ki li mɔk gbingbanŋann, ki bi bikin a li-i sa fit, bin te ki ŋaruŋ na-n saan kɔɔ leŋ ki do gbingbann na.

⁴⁰ Ŋanne ki bi ji din pot ŋmiit na, ki kutkpiata maŋ baa nyun ni, ŋaan bia lot ŋmiit nba lor daat nba ki bi dia ki nuun ŋaruŋ na, ki ji fit donn chinchenn ŋaruŋ numm po, a wouŋ-ii da kii saa namm. Ŋanne ki bi tan per gbingbann,

⁴¹ ki ŋaruŋ na tɔɔnn po fer tiŋ ni. Li tɔɔnn po na nba fer tiŋ ni biaŋinba na, ki ŋaruŋ na gbar saanu, ki nyunpana ji lia li poorpo nan paŋ ki jintir.

⁴² Tɔn, ki lanjimanba na ji loon bin kpi dansarkɔɔra na kur, a nnee kaa, li pasiar bi tan sa mann ki duk poot ki chiar.

⁴³ Ŋaan lanjimanba maŋ saakɔɔ na ŋarin loon ki wun tinn Pɔɔl. Li paak, ki u tiab a bi daa kpibi, ŋaan tur mɔb a sɔɔ kur nba mi nyunduku, bin yukir baa nyun na ni sinsinn ki duk poot.

⁴⁴ Ŋaan binba biar ki ki mi duku na-n mun soor soor daat amii ŋarunyaka ki wɔb ki duk poot. Ti kura ji din teen nnee ki tinn ti mɔŋ.