Toona 26 - Yennu Gbounpaauŋ Mɔɔr

¹ Li yoo na ki Bat Agripa yet Pɔɔl a “N chaba mɔb. Pakin nyinn a mɔŋ.” Ki Pɔɔl donn u nuu sanpaapo a wun pak ki nyinn u mɔŋ, ki yet a

² “Bat Agripa, li maŋin bonchiann nan ma see a tɔɔnn ni dinna, ki yaa n pak ki nyinn n mɔŋ, ki jikit saa linba kur ki Juu teeb paanin na po.

³ Ki bia jenna, n mɔk parpeenn bonchiann nan ma see a tɔɔnn ni na, nan fa tee banntɔɔ, ki mi Juu teeb sennu nan bi mɔniɔk nba tee biaŋinba kur na. Li paak, chanbaa, n barimae, din sukuru ki gbiint ma yaa n pak linba na.

⁴ “Ma fiir n bisin niwa nan mɔtana, Juu teeb kura mi ma din tuu be biaŋinba n tiŋ ni nan Jerusalem biak.

⁵ Bi poŋ min ki li fɔk. Li-i tee ki bi loon, bi sa fit wann nan n tuu waa Farisiinba Yenjiantu sɔnu nba mantik paar nee.

⁶ Ki mɔtana ma ji see ki bi bu n buut na, kimaan n mɔk dindann nan mɔsonn nba ki Yennu din senn ki tur ti yejamm na.

⁷ Li mɔsonn maŋ paake ki timm Juu teeb booru piik nan munnlee tuu mɔk dindann ki dukii nan ti tan sa la. Li paak te ki bi jiantir Yennu nan nunmɔnn yennu nan nyiɔk na. Chanbaa Agripa, li dindann maŋ paakera, ki Juu teeb paanin maan na.

⁸ Bee ki li paar i paak nan ki i teen yada a Yennu fiint kpeemmi?

⁹ “Sinsinn, n mɔŋ mɔŋ din dukin nan li kpaa talase nan ki n tun bonsiar kur ki biir Nasaret nirɔ Yisa sann.

¹⁰ Nnee ki n din tuun Jerusalem. Yennu jiantu yudamm din tuu chabin yikoo ki n so Yennu niib ki kɔɔntib dansarii. Ba din tuu bu bi maan ki tan gbenn ki chab a bin kpib na, n mɔŋ mun din tuu be binba din tuu chab a bin kpib na kann ni.

¹¹ “Yoo kur n din tuu yɔɔ ki mukisirib Yenjiantu diit kur ni, ki din tuu loon ki bii nɔi a bi ki waa Yisa. N din mantik donn wutoor bonchiann bi paak, ki li saa yakira. Li paak, n bia lek din tuu saa doi nba be tinganii ni, ki saa mukisirib biak.

Pɔɔl nba betib u lebitu po biaŋinba

¹² “Muksuk maŋ paake ki n yaan tan fiir ma n saan ki saa mukisib Damaskus, Yennu jiantu yudamm nba chabin yikoo, ki bia turin mɔb a n tun nna.

¹³ “Tɔn, Chanbaa Agripa, li din tee yensuuk nie ki n be sɔnu paak ki saa, ki tan la ki yentu nyii sanpaapo ki yeen gar yennu, ki yent nyɔkit ki lint min nan n tɔknanleeb na.

¹⁴ Ki ti kura baa tiŋ ni. Ki n gbat ki kunkɔr pak timm Juu teeb maan ni, ki yin a ‘Sɔɔl, Sɔɔl, bee ki a mukisirimi? Fa tuu yêenin na, li paake te ki li paar a paak kaman nan bonkobuk nba tuu yêen u daanɔ mɔb ki u boou lanbann na.’

¹⁵ “Ki n jiin ki boi ma ‘N Yomdaanɔ, ŋmapoe?’ Ki ti Yomdaanɔ jiin a ‘Min, Yisae, ki a mukisirin maŋ.

¹⁶ Ŋaan fiit ki set. N nyinn fine a a teen n toontunnɔ. Linba nee te ki n dɔkit a paak. Teent niib siara ki wannib fa lan biaŋinba dinna, nan linba ki n sii fiitir wanta yoo nba tan sa baar.

¹⁷ Ma tan sa tuma siaminba na, n bia tan sa nyinna daar ni Juu teeb nan nileeb nii ni.

¹⁸ Fine tee wunba sa yent bi numm po, ki bin nyi bunbɔnn ni ki kɔɔ yentu ni, ki bia nyinnib Sintaanii nuu ni ki bin kɔɔ Yennu nuu ni, a wun nyik bi biit ki chabib, ki bin la yiar, binba ki Yennu teemm u niib na sinsuuk ni, kimaan ba teenin yada paake.’

Pɔɔl nba want u toona po biaŋinba

¹⁹ “Li paak, Chanbaa Agripa, n din ki yêt Yendɔuŋ ni yerintu maŋi.

²⁰ Ŋaan sinsinn n din dɔŋ ki mɔɔnt Damaskus teebe, ki pukin Jerusalem nan Judea tiŋ ni doi nba be lokir kur po. Li poorpoewa, ki n tan mɔɔnt ki tur binba ki tee Juu teebi. N wannu ki tur niib na kur tee a bin nyik bi biit kii waa Yennu sɔnu, kii tuun bonŋann, ki lin wann nan bi set nyik bi biit nan mɔnii.

²¹ “Li din tee linba na paake, ki Juu teeb din soorin, ma daa din be Yennu jiantu ŋasaakak ni na, ki bi din loon ki bin kpin,

²² ŋaan la jii ki tan tuu dinna, ki Yennu guun, ki n ji be ki see ki mɔɔntir u maan ki teen tatimm nan paarib kura na. Ma piak linba na, ŋaan ŋann nan Moses nan Yennu sɔkiniinba nba din tuu piak linba kur na, li ki mɔk bɔkitu. Ŋamm din piak linba tan sii tee,

²³ a Yennu Niganntɔɔ Masia tan sa fabir di fara ki kpo, a ŋɔɔe bia tan sii tee sinsinn daanɔ nba tan sa fiir kuun ni, a ki li paak ki u bia tan sa mɔɔnt ki tur Juu teeb nan binba ki tee Juu teeb mun biak, ki beerib barii nba tan sii yentir bi numm po.”

²⁴ Pɔɔl nba din piak a wun nyinn u mɔŋ na, ŋanne ki Festus tian u paak ŋaan yet a “Pɔɔl, a waata! A bannchiauŋ paake te ki a waat.”

²⁵ Ki Pɔɔl jiin a “Chanbaa Festus, n ki waat kaa. Maan nba ki n piak na, li tee barmɔniie, ki bia mɔk paak.

²⁶ Chanbaa Agripa, n mɔk parcheenn ki sa pak ki tura, kimaan a mɔŋ mi linba na po, ki n bia teen yada nan barii maŋ ki jikit saa Yisa po ki bɔr a boori, kimaan linba din teen maŋ, li din ki woon kaa.

²⁷ Chanbaa Agripa, a teen Yennu sɔkiniinba maan yadawa-aa? Ŋaan n lek mi nan a teen yadawa.”

²⁸ Ki Bat Agripa jiin Pɔɔl a “Fin dukii mi a a pinpauk mintik na sa fit dakin ki n teen Yisaweirɔwa.”

²⁹ Ki Pɔɔl jiin a “N pinpauk-i fɔk amii la ki fɔki, min yaa Yenmiaru tee ki fin nan niib kura nba gbiintir n maan na dinna na, see ki fin nan ŋamm-n teen Yisaweira kaman nan ma tee biaŋinba na, ŋaan jarit nba na kuukɔɔe ki i kii mɔki.”

³⁰ Ŋanne ki Bat na nan yudaanɔ na nan Beniis, nan binba kur kar leŋ na kur fiir ki nyii.

³¹ Ba yaa bin jii yat yoonba, ki bi ji beer bi leeb a “Jɔɔ na taan ki tun biit ki li ŋan nan bin kpiu, amii ki kɔɔnɔ dansariki.”

³² Ki Bat Agripa yet Festus a “Nirɔ na-i daan bo-i kii miar a u sa gaan u maan na kpanbara yudaanɔ Siisa peŋi, ti bo sa fit ŋaauwa.”