Toona 23 - Yennu Gbounpaauŋ Mɔɔr

¹ Ŋanne ki Pɔɔl got tituk kaanu damm maŋ sirrr, ki tan yet a “Chanbaanba nan n naa waas, ma din be ki tan tuu mɔtana, n mi nan li fan nan Yennu.”

² Wa yet nna, ki jiantu yudaanɔ Ananias bet binba see ki kpia Pɔɔl na a bin faa Pɔɔl mɔb paak.

³ Ki Pɔɔl betɔ a “Yennu sa faa fin, kpinkpannii daanɔ na! A kar leŋ ki bu n buut kaman nan ti sennu nba want biaŋinba na, ki bia yaa a bin faan, ŋaan ki sennu na ki chab nna.”

⁴ Ki binba see ki kpia Pɔɔl na betɔ a “A tan sukii Yennu jiantu yudaanɔ-ɔɔ? ”

⁵ Ki u jiin a “N naa waas, n ki mi nan u tee jiantu yudaanɔe. Yennu gbouŋ poŋ yet a ‘Li ki ŋan ki a pak barbiiuk ki jiin a yudaanɔ po.’ ”

⁶ Tɔn, Pɔɔl nba ji bann nan tituk kaanu maŋ siab tee Sajusiinba, ki leeb mun tee Farisiinba na, ki u yet sanpaapowa niib na ni a “N naa waas, n tee Farisii nirɔe, Farisii bike teen. Ki n mɔk dindann nan kpeemm tan sa fiira. Li paake te ki bi bu n buut na.”

⁷ Wa pak nna maŋ yoonba, ki mɔniɔk ji fiir Farisiinba nan Sajusiinba maŋ sinsuuk ni, ki bi bɔkit leeb.

⁸ (Kimaan Sajusiinba na din yaa a kpeemm fiiru kaa, amii malakanba kaa, a sei bia kaa, ŋaan Farisiinba ŋarin din teen li kura yadawa.)

⁹ Ŋanne ki bi tintianii na ŋammit ki do ki pukii. Ki sennu wannteeb na siab, binba tee Farisiinba na, fiir pak nan nunmɔnn a “Ti ki la jɔɔ na biiti. Li pasiar Yennu set tun seek amii malakae, ki u pak turɔ a wun pak.”

¹⁰ Ki mɔniɔk na din ŋamm ki fiir bonchiann, ki lanjimanba yudaanɔ na mi a bi tan sa mann kpet ki dat Pɔɔl ki pat patɔ. Li paak ki u tur mɔb a lanjimanba-n saan ki saa nyinn Pɔɔl tituk kaanu damm maŋ ni, ki saan nanɔ tabdiiuk na ni.

¹¹ Li poorpo ki nyiɔk tan bɔnn, ki ti Yomdaanɔ Yisa baar Pɔɔl peŋ, ki tan betɔ a “I mɔk parcheenn. A poŋ turin siara Jerusalema, ki li bia tee talase ki a bia tun nna Rom.”

Biaŋinba ki bi lorin lor a bin kpi Pɔɔl

¹² Li din tan yent sanyiɔk, ki Juu tesiab tikir, ki kar lor lor, ŋaan bia por por, a bi kan di siari amii ki nyu siari, see ki bin tan kpi Pɔɔla.

¹³ Binba din lor lor maŋ din yab gar kaman nan niib piinna na.

¹⁴ Ŋanne ki bi fiir saan jiantu yudamm nan saakab boor ki yetib a “Ti por por nba paare a ti kan di siari amii ki nyu siari, see ki tin tan kpi Pɔɔla.

¹⁵ Li paak, yimm nan tituk kaanu damm na-n tun toomii Rom lanjimanba yudaanɔ na peŋ, ki wun nyinn Pɔɔl ki baar nanɔ i boor nna, ki lii tee kaman nan i loon ki i boiɔ buboite, ki bann u maan maŋ po chib chib na. U tan sii baat yoonba na, ŋaan sɔɔ ki ti poŋ teen siira a ti kpiu.”

¹⁶ Ŋaan ki Pɔɔl niipoo bija mun gbat bi lora maŋ. Ki u saan tabdiiuk na ni, ki saa bet Pɔɔl li bannu.

¹⁷ Pɔɔl nba gbat nna maŋ, ki u yiin lanjimanba saakɔyenɔ, ki tan betɔ a “Jiin naasimɔ na, ki saan nanɔ a yudaanɔ peŋ, kimaan u mɔk siare ki yaa wun betɔ.”

¹⁸ Ki lanjimanba saakɔyenɔ na jiiu ki saan nanɔ bi yudaanɔ na peŋ, ki yetɔ a “Pɔɔl wunba ki ti diau yommik na yet a n baar nan naasimɔ na a peŋ, a ki u mɔk siare ki loon ki wun beta.”

¹⁹ Ki lanjimanba yudaanɔ na soor u nuu soonna, ki saan nanɔ kpiŋ, ki saa boiɔ, “A mɔk barlaniie ki loon ki a betimi?”

²⁰ Ki u yetɔ a “Juu teeb taan mɔb ki loon ki bin won boia wonn ki a nyinn Pɔɔl ki sik nanɔ bi tituk ni, ki lii tee kaman nan bi loon ki bin bo boiɔ buboite, ki bann u po chib chib na.

²¹ Ŋaan a daa fiin bi po, kimaan Juu tesiab yab, ki gar nan jab piinna nawa, binba sa bɔr ki guu a bin kpiu. Bi kura por pore, ki yaa a bi kan di jeeti amii ki nyu siari, see ki bin tan kpiuwa. Bi kpan teen siirewa ŋaan ji guu a mɔb.”

²² Ŋanne ki lanjimanba yudaanɔ na bet naasimɔ na a “I mi ki a yet sɔɔ nan a kumiin li labaar,” ŋaan te ki u ŋmat.

Biaŋinba ki bi jii Pɔɔl ki saan nanɔ Siisarea

²³ Ki lanjimanba yudaanɔ na yiin u saakab na ni bannlee ki tan betib a “Jiin man lanjimanba kobiinnlee, nan tanjakira piinnlore, ŋaan jii kpantɔɔra kobiinnlee mun, ki teen siir ki saan Siisarea. Yi nyi gɔtomm yoo nyiɔk na, ki saan.

²⁴ Ŋaan jii taamm ki tur Pɔɔl ki wun jak, ŋaan tenn taanlei kii dia, kii saa nanɔ soonna, ki saa baar yudaanɔ Fiiliks peŋ, ki u daa laat daŋi,”

²⁵ ŋaan sɔb gbouŋ ki turib, a bin saa tur yudaanɔ Fiiliks, ki li want a nna:

²⁶ “Min Klɔdius Lisiase sɔbin gbouŋ na, ki teen Chanbaa yudaanɔ Fiiliks, n foonta.

²⁷ “Juu teebe daan soor jɔɔ na, ki daan bo sa kpiuwa, ŋaan ki n gbat a Rom teeb turɔ bi yaaka. Li paak, ki n jii lanjimanba, ki saan ki saa fatɔ,

²⁸ ki loon ki n bann linba paake ki bi paau mapipaat maŋ. Li paak ki n jiiu ki baar nanɔ bi tituk kaanu damm boor,

²⁹ ki bann nan li tee bi mɔŋ sennu paake ki bi paau maan maŋ. Ŋaan li ki tee bisiat kaa ki li bo jaŋ nan u kuumi, amii dansarkɔɔnu.

³⁰ “Ŋanne ki bi bo kumiin a Juu teeb lorin lora a bin kpiu. Li paak ki n yaa a lanjimanba-n jiiu ki baar a peŋ yian yian, ŋaan ki n bia bet binba paau mapaauk maŋ, a bin baar a boor, ki tan wanna u biit nba tee biaŋinba.”

³¹ Ŋanne ki lanjimanba na jii Pɔɔl kaman nan bi yudaanɔ nba turib mɔb biaŋinba na, ki saa nanɔ, ki saa baar doo nba yi Antipatris na, li nyiɔk maŋ.

³² Ki li yent sanyiɔk, ki lanjimanba nba somm taatiŋ na ji ŋmat kun Jerusalem, tabdiiuk na ni, ŋaan chab tanjakira na a bin saan nanɔ.

³³ Ki bi jiiu ki saan nanɔ Siisarea, ki saa jii gbouŋ na ki tur yudaanɔ Fiiliks na, ŋaan bia jii Pɔɔl ki kubinɔ.

³⁴ Ki yudaanɔ maŋ gaar gbouŋ na ki karin, ŋaan boi Pɔɔl a “A nyii tinlaŋe?” Ki u jiinɔ a “Silisia.” Wa bann nna maŋ

³⁵ ki u yetɔ a “Binba paa-a mapaauk maŋ-i baar yoonba, n sa bu a buut.” Ŋanne ki u tur mɔb a guuteeb-ii diau Bat Herod ŋaak ni.