Toona 21 - Yennu Gbounpaauŋ Mɔɔr

Pɔɔl nba din saan Jerusalem biaŋinba

¹ Ŋanne ki ti din tat nyik Yisaweira saakab maŋ, ŋaan tokin baar Kos, ki li yent ki ti baar Rodes, ki bia nyii leŋ ki saan Patara.

² Leŋe ki ti din la ŋaruŋ nba saa Fonisia tiŋ ni. Ŋanne ki ti kɔɔ ŋaruŋ maŋ ki saa.

³ Ta tan laat Saiprus yoonba na, ki ti gar ti gaŋ po, ki tan baar Siria tiŋ ni, ki nyii ŋaruŋ na ni, doo nba ki bi yi Taya na ni, ki ŋaruŋ maŋ damm din yaa bin nyinn tiat leŋ.

⁴ Leŋe ki ti din la Yisaweira, ki ji biar be bi boor ni ki saa jaŋ daa ŋannlore, ki Yennu Seyeeŋ din te ki bi bet Pɔɔl a u ji daa saa Jerusalemi.

⁵ Ki ti saanu yoo tan baar nan tin saan, ki ŋamm nan bi poob nan bi waas din chianit, ki saa nyii doo na ni, ki dianit. Ki ti kura gbaan mɔk-kpiŋ ki miar Yennu.

⁶ Ki li poorpo ki ti chab leeb, ŋaan yaan kɔɔ ŋaruŋ ki saa, ki bi mun ŋmat ki kun.

⁷ Ŋanne ki ti nyii Taya ki baar Tolemais. Leŋe ki ti saan foont Yisaweira, ŋaan biar bi boor ni dayenn kuukɔɔ.

⁸ Ki li yent sanyiɔk ki ti nyii Tolemais ki baar Siisarea ki saan kɔɔ Filip ŋaak ni, wunba mɔɔntir Yisa barŋanii na, ki be. U din tee jab bannlore nba ki bi din gannib Jerusalem a bii tee jetorteeb yudamm na yenɔe.

⁹ Ki u din mɔk sapaamm banna, ki bi mun din tee binba sɔkint Yennu maan.

¹⁰ Ti din be leŋ ki teen kaman nan daa ŋaŋŋa nawa; ki Yennu sɔkinii, wunba ki bi yiu Agabus na din nyii Judea ki sik,

¹¹ ki baar ti boor ni, ki tan jii Pɔɔl gbann, ki lor u mɔŋ mɔŋ taa nan u nii, ŋaan yet a “Yennu Seyeeŋ nba yaa biaŋinbae na, a gbann na daanɔ, a Juu teeb nba be Jerusalem na tan sa lorɔ nnee, ŋaan jiiu ki kubinɔ binba ki tee Juu teeb na nuu ni.”

¹² Ta ji din gbat nna maŋ, ki ti kura barin Pɔɔl a u ji daa saa Jerusalemi.

¹³ Ŋaan ki u ji din jiin a “Bee teen ki i mɔ ki loon ki i kɔnn n kpinkpenti? Ba tan sa lorin Jerusalem na paak kuukɔɔ kaa, ŋaan min ŋarin poŋ teen siir nan ki n kpo ti Yomdaanɔ Yisa paaka.”

¹⁴ Wa yet nna na, ti mi nan ti ji gbarɔii na, ki ti nyikɔ, ŋaan biar ŋmin, ŋaan yet a “Li fan nan ti Yomdaanɔ.”

¹⁵ Ti yukiru maŋ poorpoe, ki ti ji din teen siir ki saa Jerusalem.

¹⁶ Ki Yisaweira nba be Siisarea na, ki bi siab mun din weit ki saan. Ŋanne ki bi din jiit, ki ti saan Minason ŋaak ni. Minason maŋ poŋ din tee Yisaweikpere ki din tee Saiprus nirɔ.

Pɔɔl nba gɔn Jems biaŋinba

¹⁷ Ta din baar Jerusalem yoonba, ki leŋ Yisaweira gaarit nan parpeenn bonchiann.

¹⁸ Ki li yent sanyiɔk, ki timm nan Pɔɔl saan a ti saa foont Jems. Yisaweira saakab kura mun din be leŋ li yoo.

¹⁹ Ŋanne ki Pɔɔl foontib, ŋaan kat wannib linba kur ki Yennu tun ki tur binba ki tee Juu teeb na, ŋɔɔ Pɔɔl mɔɔntii na po.

²⁰ Ba ji din gbat u maan maŋ na, ki bi kura pak Yennu, ŋaan bet Pɔɔl a “Ti naa bik, a mi Juu teeb nba tee tusa biaŋinba ki teen Yisa yada ki waa u sɔnu na, ki bi kura bia dia Moses sennu ken ken ken,

²¹ ki bia gbat a po, a a tuu want Juu teeb kura nba be boorganu tinii ni a bin yêt Moses sennu, ki bia beerib a bi daa porii bi waas puna, a ki bia daa waa Juu teeb na sennii.

²² Ki a sa teen nlee na? kimaan Juu teeb nba tee Yisaweira na lek sa gbat nan a baar na.

²³ Li paak, ti-i beta biaŋinba, fan tun li biaŋ. Jab bannae be nna ki por por nan Yennu.

²⁴ Tɔn, fin nan ŋamm-ii saa ki saa ŋamm i mɔŋ, ŋaan ki a pa likirii bi paak, ki bin koor bi yura, ki sɔɔ kur-n fit lian bann nan maan nba ki bi tuu piak a po na, li set ki tee mɔnii kaa, ŋaan a mɔŋ poŋ waa Moses sennu maŋ nan li sɔnu.

²⁵ Ŋaan binba ki tee Juu teeb ŋaan teen Yisa yada ki waau na ŋarin, ti poŋ sɔb gbouŋ ki turib, ki betib a bi ji daa mi ki di jeet nba ki bi mann patiri, amii ki ŋman sɔmi, amii bonkobuk nba ki bi ŋmakir ki kpii, ŋaan bia soor bi mɔŋ nan bonchonchonn toona.”

²⁶ Ŋanne ki Pɔɔl din jii jab maŋ, ki li tan yent sanyiɔk, ki ŋɔɔ nan ŋamm din ŋamm bi mɔŋ, ki fit lian kɔɔ Yennu jiantu ŋasaakak ni, a bin wann nan daa nba ki bi sii be nan ba tan sa baar nan piinii ki tur Yennu, ki gbenn bi mɔpora maŋ.

Pɔɔl sooru labaar

²⁷ Daa ŋannlore daar nba tan per yoonba, ki Juu teeb nba nyii Asia ki baar Jerusalem ki be Yennu jiantu ŋasaakak ni na, ki bi tan la Pɔɔl, ki tian u paak, ŋaan te ki niib na kur fiir jir jir jir, ki soorɔ,

²⁸ ŋaan bia tian tintianii a “Juu teeb, sommit man! Ŋɔɔe tee nirɔ nba lin lokir kur po, ki want niib ki biirib nan Juu teeb nan Moses sennu nan Yennu jiantu ŋasaakak na, ki bia taan baat nan binba ki tee Juu teeb gbaa ti jiantu ŋasaakak na ni, ki bi tan biir ti ŋaak nba yeen na.”

²⁹ Ba din dɔŋ la Pɔɔl nan Trofimus, wunba din tee Efesus nirɔ na, ki bi be doo na ni, ki bi dukin ki mi a Pɔɔl kɔɔ nanɔ Yennu jiantu ŋasaakak na nie.

³⁰ Li paak ki doo na niib kur din fiir, ki niib kura chiar, ki baar kpir Pɔɔl, ki soorɔ ki piit nyinnɔ Yennu jiantu ŋasaakak na ni. Li taakpaak ni na, ki siab loon ŋaak na tammɔi.

³¹ Ki bi ji yaa bin kpi Pɔɔl. Li yoo na ki Rom teeb lanjimanba yudaanɔ ji gbat a Jerusalem teeb kura fiir jir jir jir.

³² Ki u kakit yiama, ki jii lanjimanba nan bi saakab, ki bi faar sik nibur na ni. Niib na nba lau nan lanjimanba na yoonba, ki bi ji nyik Pɔɔl boot.

³³ Ki lanjimanba yudaanɔ na saan soor Pɔɔl, ŋaan tur mɔb a bin baanɔ jarit ŋannlee, ŋaan boib a “Nirɔ na tee ŋmee? A u biir bia?”

³⁴ Ki nibur na ni, siab tian Pɔɔl paak jiak jiak. Bi barŋmatuk maŋ paak ki lanjimanba yudaanɔ na ki fit bann li paak bonŋanni. Li paak, ki u tur mɔb a bin jiiu ki saan nanɔ tabdiiuk ni.

³⁵ Ba baar tabdiiuk na tammɔb taaŋmaata paak, ki lanjimanba na jiiu sanpaapo, kimaan nigbouŋ nba din loon bin kpiu na paak.

³⁶ Ki bi ji din waa bi poor ki tian tintianii a “Kpimɔ man! Kpimɔ man!”

Linba ki Pɔɔl pak tur nibur na

³⁷ Lanjimanba maŋ nba ji din yaa bin kɔɔ nanɔ na, ki u boi lanjimanba yudaanɔ na a “A sa sak ki n pak siar ki turanii?” Ki u jiin boiɔ a “A gbia Griik maamii?

³⁸ N mi a a tee Ijipt nirɔ nba ki daa ŋannlee nna nba gar na ni ki a te ki niib baar nan kunkɔnn doo na paak, ki a jii nifokpiirit tusa ŋanna, ki saan namm ki daan be muuk ni na.”

³⁹ Ki Pɔɔl jiin a “N tee Juu nirɔe, ŋaan bi marin Tasus nba be Silisia yakir nie. N poŋ tee digbangbeŋŋir ni nirɔe. N barimae, ŋaant ki n pak ki tur niib na.”

⁴⁰ Ki lanjimanba yudaanɔ na chabɔ mɔb. Ki Pɔɔl ŋmant ki set tabdiiuk tammɔb taaŋmaata na paak, ŋaan ŋak u nuu ki tur niib na, a bin ŋmin. Ba ŋmin yoonba, ki u pak namm Juu maan ni, ki yet a