Toona 20 - Yennu Gbounpaauŋ Mɔɔr

Pɔɔl sɔnu saanu Masedonia nan Akaya tinii ni labaar

¹ Fuut maŋ nba din ŋmin na poorpoe, ki Pɔɔl ji din yiin Yisaweira na, ki tan chee bi para, ŋaan ji chabib, ki yaat ki saan Masedonia tiŋ ni,

² ki din lin Masedonia tiŋ yaka po, ki bia pak Yisaweira nba be leŋ na Yennu maan bonchiann ki kɔɔntib para, ŋaan gar saan Akaya,

³ ki ji be leŋ ki saa jaŋ ŋmaarii ŋanntaa. Ki li poorpo, ki u ji tee siir a wun saan Siria, ŋaan bann nan Juu teeb lorin lora ki guu-u, ki u ji loon wun ŋmat ki saan gar Masedonia tiŋ ni.

⁴ Ki Pirus bik Sopata, wunba nyii Berea na, nan Aristakus nan Sekondus, binba nyii Tesalonika na, nan Gaius wunba nyii Debe na, nan Tikikus nan Trofimus, binba nyii Asia tiŋ ni na, nan Timoti, ŋamme din saan nan Pɔɔl.

⁵ Ki bi gar tɔɔnn ki ji saa guutit Troas.

⁶ Jaamm nba ki bi din tuu di boroboro nba kaa datiŋ na dinu poorpoe, ki ti ji din kɔɔ ŋaruŋ, ki nyii Filipi, ki saa Troas. Ki daa ŋaŋŋmu daar ki ti baar bi boor Troas, ki biar leŋ ki jaŋ daa ŋannlore.

Troas doo labaar

⁷ Tɔn, ki foon daar dajouk ki ti tikir leeb, ki taan nan Yisaweira nba be leŋ na, a ti di ti Yomdaanɔ jeet. Ki Pɔɔl mɔɔnt Yennu maan dik dik dik nan tansuunii, kimaan la sa yent, ki wun gar na paak.

⁸ Ti din tikir ditɔɔtuk nna nie, ki bi din joo fita bonchiann leŋ.

⁹ Ki naasinsɔɔ nna mun din be ki u sann yi Yutikus, ki u din kar ditɔɔtuk na takorbonn paak. Ki Pɔɔl mɔɔnt Yennu maan mɔkmɔk, ki u kar tiŋŋit gɔɔn, ki ji tan gɔɔn ki libit nyii ditɔɔtuk munntaa na ni, ki tan baa tiŋ ni. Ki bi sik jiiu, ki sɔɔ ki u kpoa.

¹⁰ Ki Pɔɔl nyii ditɔɔtuk na ni, ki somm sik tan fabin u paak, ki diau, ŋaan yet a “I daa te ki i para biiri. U fo,”

¹¹ ŋaan ŋmat ki doo ditɔɔtuk na ni, ki saa dii jeet. Li poorpo biak ki u mɔɔnt Yennu maan mɔkmɔk nan la tan yent, ki u ji nyikib, ŋaan yaan yaat gar.

¹² Ŋaan ki bi ji jii naasimɔ na ŋarin, ki u mɔk manfoor, ki bi kun nanɔ nan parpeenn, ki li ki tee waaminna.

¹³ Li poorpo ki ti bia kɔɔ ŋaruŋ, ki dɔŋ gar saan Asos. Leŋe ki ti din yaa ti jii Pɔɔl, kimaan ŋɔɔ din betit a tin chetɔ. U din loon wun somm taatiŋe ki baar leŋ.

Pɔɔl nba baat Miletus biaŋinba

¹⁴ Wa din baar Asos yoonba, ki u lat. Ki ti ji jiiu ki kɔɔnɔ ŋaruŋ na ni, ki saan Mitilene.

¹⁵ Ki ti bia tan tɔɔt leŋ ki baar Kios li sanyafannuk. Ki li bia yent ki ti baar Samos, ki li bia tan yent ki ti baar Miletus.

¹⁶ Pɔɔl din ki loon a wun saan Efesusi, kimaan u din ki loon ki wun yukir Asia tiŋ ni, ŋaan u din loon yian yian, kimaan u din loon a li-i sa fit, wun baar Jerusalem dajaann nba ki bi yi Pentekost na.

Biaŋinba ki Pɔɔl chabit Yisaweira saakab

¹⁷ Ŋanne ki Pɔɔl din tun toomii a bin nyi Miletus doo ni, a ki saan Efesus ki saa yiin Yisaweira saakab na.

¹⁸ Ba baar yoonba, ki u betib a “I mi n binbeŋ nba tuu be biaŋinba, ma din sint baar Asia tiŋ nna ki jikit saa.

¹⁹ I bia mi ma din tuun Yennu toona nan sikininmɔŋ bonchiann, nan ninnyuut, ki bia la fara Juu teeb lora paak.

²⁰ Ki i bia mi nan ma din mɔɔntir Yennu maan, ki bia wanti niib ni nan i ŋei ni na, n din paki linba kur sa sommi, ki ki nyiki, ki bia ki tenn siari,

²¹ ki bia kpaan Juu teeb nan binba ki tee Juu teeb kur a bin nyik bi biit kii waa Yennu sɔnu, ki teen ti Yomdaanɔ Yisa yada.

²² “Tɔn, ki mɔtana Yennu Seyeeŋe mabin ki n yaa n saan Jerusalem, ŋaan n ki mi linba sa saa teenin leŋi.

²³ Ŋaan ma lin doo kur na ni, Yennu Seyeeŋe tuu wantin nan nunmɔnn a dansarik nan fara tan sii tee n yare Jerusalem.

²⁴ Ŋaan n ki yi n manfoor ki li tee siari, kimaan min ŋarin loon ki n tun toona nba ki ti Yomdaanɔ Yisa turin nee ki gbenn, ki li toona tee ki mii mɔɔntir barŋanii nba want Yennu ninbatinu poe.

²⁵ “Nnara, i mi nan n din lin i kura ŋei ni, ki mɔɔntir Yennu naan labaar. Tɔn, ki mɔtana, n mi nan i ji kan mi ki lami.

²⁶ Li paake te ki n beeri dinna daar na, ahoo, wunba kɔŋ manfoor nba kaa gbennu na, n nuu kaa jiki,

²⁷ kimaan n ki mi ki fɔrint ki ŋmat poorpo nan ki n mɔɔnt Yennu maan maŋ kur ki wanniini.

²⁸ Li paak, i dia i mɔŋ man bonŋann, nan Yisaweira nba ki Yennu Seyeeŋ kubin i nuu ni a yii tee bi yudamm kii goriib. Ŋamme ki Yennu jiib ki teemm u niib, kimaan u Bija Yisa nba din kpo na paak.

²⁹ N mi nan mi-i kaa, nibiit tan sa baar i sinsuuk ni, ki biir Yisaweira siab kaman nan kinkata nba tuu so pei biaŋinba na.

³⁰ Ki yoo bia baat ki nisiab tan sa nyi i mɔŋ mɔŋ sinsuuk ni, ki fa fai Yennu barmɔnii wannu po, ki biir Yisaweira, ki tunnii bi yan ki te ki bii waa ŋamme.

³¹ Li paak, i guu man, ki daa tammit ma din kpaan i kur nan ninnyuut, ki ki nyik, yennu nan nyiɔk, ki tan jaŋ bina ŋanntaa na ni.

³² “Mɔtana, n jikiti ki teei Yennu nuu ni, ki bia mi nan ya bann u maan nba want u ninbatinu po, li maan maŋ sa fit te ki i waau fanu, ki bia sa fit turi yiar sanpaapo, binba kur ki u teemm u niib na sinsuuk ni.

³³ I mɔŋ bia mi nan n ki nian sɔɔ likirii amii tiati.

³⁴ Ma din be i sinsuuk ni na, i mɔŋ mɔŋ bia mi nan n din dia n nii nee ki tuun, ki min nan n weinanleeb di ki bia gbab.

³⁵ Ma din tuun nna maŋ paake want nan see ki tii tuun bonchiann ki fit ki somm talasdamm. Li ŋan ki ti tiar ti Yomdaanɔ Yisa maan, nan wa yet yaa a ‘Parpeenn sii tee daanɔ nba piin piinii yare, ki gar wunba gaan.’ ”

³⁶ Pɔɔl nba gbenn maan maŋ yoonba, ki bi kura lakin gbaan ki miar Yennu.

³⁷ Ŋaan ki bi ji yaa bin chab Pɔɔl, ki mɔnii soorib, ki bi kura mɔ, ŋaan jii bi nii ki kokin kokinɔ,

³⁸ kimaan bi para mantik din biir nan wa yaa a bi ji kan lau na paak. Ki bi din chianɔ ki saan nanɔ mɔkgbeŋŋir na ni, a bin saa chabɔ ki wun kɔɔ ŋaruŋ.