Toona 2 - Yennu Gbounpaauŋ Mɔɔr

Yennu Seyeeŋ baaru labaar

¹ Tɔn, jaamm nba ki bi yir Pentekost daare baar; daar maŋe ki Yisaweira kura lakin taan leeb boyennkɔɔ ni.

² Li taakpaak ni ki fuut nyii sanpaapo ki fu naan nan wonpaaruko da na, ki baar sik ki gbee diiuk nba ki bi kar na ni.

³ Ki bi la ki siar naan nan mupeuŋ na, ki yat ki tɔɔ tɔɔ sɔɔ kur paak,

⁴ ki Yennu Seyeeŋ gbee yent sɔɔ kur ni, ki bi piin piak barganii kaman nan Yennu Seyeeŋ nba wannib biaŋinba.

⁵ Ki Juu teeb nba tee yentina mun din be Jerusalem li yoo, binba nyii tinii kur po tingbouŋ na ki baar leŋ.

⁶ Ba gbat fuut maŋ yoonba, ki nibur tikir leŋ, ki li teemm yaarlituk, kimaan Yisaweira maŋ piak barganii sɔɔ kur maan ni ki u gbia.

⁷ Ki li teemm bakitnauŋ nan yaarlituk, ki bi boi bi leeb a “Niib na kur nba piak na ki tee Galilee teeb kaa-aa?

⁸ ki li teen nlee ki ti kura tan jia gbia ki bi piak ti mɔŋ mɔŋ maan nna?

⁹ Ti siab nyii Patia nan Media nan Elam nan Mesopotamia nan Judea nan Kapadosia nan Pontus nan Asia,

¹⁰ nan Frijia nan Pamfilia nan Ijipt, nan Libia yaka po siaminba kpia nan Sairene na; ki ti ni yemm mun bia nyii Rom;

¹¹ ki ti siab tee Juu teeb, ti siab mun bia tee boorganu nba din lebit bi jiantu ki waa Juu teeb Yennu; ki ti yemm mun bia nyii Kreet nan Arabia, ŋaan ki ti kura lek gbia ki bi piak ti mɔŋ mɔŋ maan ni, ki piak dont Yennu sann nan u bakitnauŋ toonjaana nba ki u tun.”

¹² Ki li bakit ŋaan yaar litib ki ŋmat bi yan, ki bi boi bi leeb a “Linba na paak tee bee?”

¹³ Ki siab mun bia laa ki sarikit Yisaweira maŋ a “Bi nyuu daame ki yib.”

Piita mɔɔntii po

¹⁴ Ŋanne ki Piita nan u leeb piik nan yenɔkɔɔ na fiir ki set nibur na tɔɔnn ni; ki Piita pak sanpaapowa a “Yimm Juu teeb, nan yimm nba kur be Jerusalem na, gbiintir man ma yaa n paki linba na, kimaan n mɔk siare ki loon ki i bann.

¹⁵ Ya dukii nan ti yibe na, ŋaan ti ki yib kaa, kimaan li daa tee sanyayendaanne.

¹⁶ Li tee linba ki Yennu sɔkinii Joel din bunt buntir ki yaa linba tan sa teen nee, a

¹⁷ ‘Yennu yet a: Dunia joontu yoo n tan sa tun nnee: n tan sii sikint n Seek sɔɔ kur paak, ki i bonjabis nan i sapaanbis tan sii sɔkint n maan, ki i naasimm mun tan sii laat yerintu, ki i jakpera tan sii damii damiit.

¹⁸ Ki li yoo maŋ n tan sii sikint n Seek maŋ n daaba nba tee jab nan binba tee poob paak, ki bi mun bia tan sii sɔkint n maan.

¹⁹ N tan sii tuun toonjaana sanpaapo, nan bakitnauŋ nyina tingbouŋ na ni; ki sɔn nan muu nan munyuuk tan sii be,

²⁰ ki yennu tan sa kpint ki bɔnn, ki ŋmaarik mun tan sa kpint ki mɔnn kaman nan sɔn na. Li tan sa teen nneewa, ki ti Yomdaanɔ-n tan jen sik tingbouŋ na ni ki bu niib buut; ki u jenu daar maŋ tan sii tee dajaanne;

²¹ ki sɔɔ kur nba tan miarɔ nan u sann ni sa la tinnu.’ ”

²² Ŋanne ki Piita bia ŋamm yet a “Yimm Israel teeb, gbiintir man linba ki n yaa n beti ki jikit saa Yisa nba tee Nasaret nirɔ na po; i mɔŋ mɔŋ mi nan Yennu te ki u tuu tuun bakitnauŋ toonjaana nan nyina i ni, ki li set want nan mɔnii nan Yennue tumɔ.

²³ Ŋaan Yennu mi linba yaa lin tan teen. Li paak, ki u dɔŋ lor lor ki kubinɔ i nuu ni, ki i te ki biitdamm kpaa tabinɔ dapunpunn paak ki kpiiu, ki li want nan yimme set kpiiu.

²⁴ “Wa daan kpo ki daa be kuun nii ni na, ki Yennu fatɔ ki fiinɔ kuun ni, kimaan kuun ki fit diau.

²⁵ Kimaan David din bunt buntir ki jikit saa Yisa po ki yaa a ‘N mi nan n Yomdaanɔ Yennu yɔɔ be nanin, ki u bia see n poorpo ki guun ki n ki laat daŋi.

²⁶ Li paak n mɔk parpeenn ki piak parpeenn maan. Mi-i lekii taŋŋi kpo gbaa, ŋaan n sii mɔk dindann,

²⁷ kimaan u tan kan nyik n seek ki lin kpakin kpeentiŋi. N tee u popeendaanɔe, ki u kan sak ki n gbanant-n tan bati;

²⁸ ki u bia te ki n bann manfoor sɔnii, ki tan sa baar kii be u tɔɔnn ni kii mɔk parpeenn bonchiann.’ ”

²⁹ Ki Piita bia ŋamm yet yaa a “N naa waas, n yaa n pak yent i nummpoe ki jikit saa ti yejasaakɔɔ David po. U din kpo, ki bi piiu, ki u kaauk daa be ti boor nna na.

³⁰ U din tee Yennu sɔkiniie, ki din mi nan Yennu senn mɔsonn ki turɔ, ki yet yaa a li-i tee ki u kpo, u tan sa jii u yaaboon-yenɔkɔɔ ki dinnɔ u mɔŋ naan.

³¹ David din mi linba ki Yennu yaa wun tan teen. Li paak ki u din pak Yennu Niganntɔɔ Masia kuunfiiru po, ki yet a Yennu Niganntɔɔ tan kan kpakin kpeentiŋ, ki u gbanant bia kan bati.”

³² Ki Piita bia ŋamm yet a “Yisa nba nee ki Yennu daan fiinɔ kuun ni, ki ti kura na mun tee u kuunfiiru maŋ siara damm.

³³ Ki Yennu bia donnɔ a wun kar u niidiitu po. Wa kar yoonba ki u gaar Yennu Seyeeŋ nba ki Yennu din senn mɔsonn ki yaa a u tan sa turit na, ki sikin ti ni bonchiann. Tɔn, mɔtana, li Seyeeŋe ki i laat ki bia gbia ti ni na.

³⁴ David nba ŋarin din kpo na, u din ki doo Yendɔuŋ ni nan u gbananti. Tɔn, u buntir maŋ din ki want u mɔŋ donnu po kaa, ŋaan u din want Yisa poe, ki din yet a ‘Ti Yomdaanɔ Yennu yet n Yomdaanɔ Masia a Karin n niidiitu po

³⁵ mɔkmɔk nan ma tan sa jii a datai ki teemm a taakpakta.’ ”

³⁶ Ki Piita bia yet a “Tɔn, li ŋan ki yimm Israel teeb kur-n bann nan li tee Yisa nee, wunba ki i daan te ki bi kpaau dapunpunn paak ki kpiiu na, ŋɔɔe ki Yennu wann nan u tee u Niganntɔɔ Masia, ki bia tee ti Yomdaanɔ biak.”

Biaŋinba ki niib tusa ŋanntaa teen Yisa yada

³⁷ Niib na nba gbat nna maŋ, ki bi para ni biir bonchiann. Ki bi boi Piita nan u leeb na a “Ei! ti naa waas, ki ti sa teen nlee?”

³⁸ Ki Piita betib a “See ki i kura-n nyik i biit, ki tin wuri Yennu nyunwuru nan Yisa Masia sann ni, ki Yennu-n nyik i biit ki chabi, ki sa turi u piinii nba tee u Seyeeŋ na;

³⁹ kimaan u poŋ din senn mɔsonn a u sa jii u Seyeeŋ na ki tur yimm nan i waas, nan binba kur be banfɔka, yimm nba kur ki u tan sa yiini ki yin sak u mɔb.”

⁴⁰ Li poorpoe ki Piita pak mɔmaan bonchiann ki nyinn siara, ŋaan bia kpaamm a “Hei! Nyint i mɔŋ man nan Yennu tubdatu nba baat mɔtana nibiit na paak na.”

⁴¹ Ki bi siab bonchiann din sak u maan maŋ, kaman nan niib tusa ŋanntaa na, ki bi wurib Yennu nyunwuru, ki bi pukin bi paak li daar maŋ.

⁴² Ki bi ŋammit ki lek tumii ki bant toomiinba maŋ wannu, ki bi jii bi yoo ki taan dia leeb nan mɔtaauk, ki lakint ki di jeet, ki bia tikii mei Yennu.

Yisaweira benu po

⁴³ Ki jijeet ji din mɔk sɔɔ kur; ki toomiinba na tuun bakitnauŋ toonjaana bonchiann nan Yennu paŋ ni.

⁴⁴ Ki Yisaweira maŋ kura bia lek dia leeb nan mɔtaauk, ki chentir bi bona ki teen bi leeb,

⁴⁵ ki tuu kɔi bi faa ki jikit li likirii ki toor bi leeb, ki jaŋŋit kaman nan sɔɔ kur nba loon biaŋinba.

⁴⁶ Daar kur bi bia lek tuu taan leebe Yennu jiantu ŋasaakak ni ki jiantir Yennu, ŋaan ji nyi ki lakint baa jedikpaguur bi mɔŋ ŋei ni, ki saa di jeet nan leeb nan parpeenn, ki ninfɔksai kaa nan bi leebi.

⁴⁷ Ki yoo kur ki bi piak dont Yennu sann, ki sɔɔ kur par mei bi paak. Ki daar kur ki ti Yomdaanɔ bia ŋammit ki te ki niib laat tinnu ki pukii bi paak.