Toona 19 - Yennu Gbounpaauŋ Mɔɔr

Efesus doo labaar

¹ Apolos nba din daa be Korint na, ki Pɔɔl ŋarin din gar Galasia nan Frijia yaka po ki saan Efesus. Leŋe ki u din saa la Yisaweisiab,

² ki boib a “Ya teen Yisa yada ki waau na, i mi ki la Yennu Seyeeŋii?” Ki bi jiin a “Aaii. Ti poŋ taan ki mi ki gbat a Yennu Seyeeŋ be kaawa gbaa.”

³ Ki Pɔɔl boib a “Ki ŋann, bi wuri Yennu nyunwuru nan ŋmee sann ni?” Ki bi yetɔ a “Bi wurit kaman nan Jɔɔnn nba din wuur niib biaŋinbae.”

⁴ Ki Pɔɔl betib a “Jɔɔnn din wuur niib Yennu nyunwuru, ki li want a bi nyik bi biite, ŋaan beerib a bin teen wunba tan sa baar na yada, ki ŋɔɔe tee Yisa.”

⁵ Ba gbat nna yoonba, ki bi ji wurib Yennu nyunwuru nan ti Yomdaanɔ Yisa sann ni.

⁶ Ki Pɔɔl jii u nii ŋaan yii bi paak, ki Yennu Seyeeŋ sik kɔɔ bi ni, ki bi ji piak barganii, ki bia piak sɔkint Yennu mɔmaan.

⁷ Jab maŋ din tee kaman nan piik nan bannlee nee.

⁸ Ŋmaarii ŋanntaa nie ki Pɔɔl ji din saan Juu teeb jiantu diiuk ni, ki want niib na nan parcheenn, ŋaan faa labaar namm, ki yabii u mɔŋ a wun kpint bi yan ki jikit saa Yennu naan po.

⁹ Ŋaan niib na siab din tee tubkangbata damme, ki din ki sak maan na, ŋaan piak barbiit nibur na ni, ki biir ti Yomdaanɔ weiu sɔnu. Ŋanne ki Pɔɔl nyikib, ŋaan jii Yisaweira na ki saan namm Tiranus wannu diiuk ni; ki daar kur jik ki u faa labaar nan niib leŋ.

¹⁰ Li din jii nna ki baar bina ŋannlee. Ki niib kura nba din be Asia tiŋ ni ki tee Juu teeb, nan nileeb kura, din gbat ti Yomdaanɔ maan maŋa.

Skefa waas labaar

¹¹ Li yoo na ki Yennu din te ki Pɔɔl tuun toonjaana nba be li kɔɔ.

¹² Ki u din tuu jii u nunfianii ki liat tiat u mɔŋ paak gbaa, ki niib baat ki tan gaan ki paa baatib paak, ki bi yiarii na nyikitib, ki narinbiit nyi baatib ni biak.

¹³ Li yoo na ki Juu nisiab din be, ki din tuu lin ki nyint narinbiit niib ni, ŋaan ji din tan yi ti Yomdaanɔ Yisa sann a bii nyint narinbiit, ki bi din beer narinbiit na a “Timme turi mɔb nan Yisa sann ni, wunba ki Pɔɔl mɔɔntir u maan na, nyimin man.”

¹⁴ Binba din tuun nna maŋ din tee jab bannlore nba din tee Juu teeb jiantu yudaansɔɔ Skefa waase.

¹⁵ Ba tan ya bin nyinn narinbiiuk jasɔɔ nna ni, ki narinbiiuk na yetib a “N mi Yisa po, ki bia mi Pɔɔl po, ŋaan ki yimm munii, i tee ŋmee?”

¹⁶ Ki jɔɔ nba ki narinbiiuk na din be u ni na yukir ki tan chibib, bii! nan paŋ, ki nyannib, ki turib danii, ki bia pat pat bi tiat, ki bi kura chiar gbananbira, ki nyii u ŋaak ni.

¹⁷ Yoo nba ki Juu teeb nan binba ki tee Juu teeb kura nba be Efesus na gbat nna, ki jaŋmaanii ji soor bi kura, ki bi donn ti Yomdaanɔ Yisa sann bonchiann.

¹⁸ Ŋanne ki Yisaweira na bonchiann pak kat bi nɔi ni biit, niib ni, ki wann linba ki bi tuu tuun.

¹⁹ Ki nyɔkluura bonchiann ji tikir bi gbant nan bi saba ki baar nann, ki tan joo muu niib kur nunii ni; ki bi kan gbant na yabint likirii, ki li tee pɔŋ tusa piiŋŋmu.

²⁰ Ŋanne din te ki ti Yomdaanɔ maan ji din ŋammit yat ki kɔɔ niib ni, ki pukii nan paŋ.

Efesus mukir labaar

²¹ Li poorpo ki Yennu Seyeeŋ din te ki Pɔɔl dukin a wun saan Masedonia nan Akaya, ŋaan saa paat ki gar saan Jerusalem, ki yet a li poorpo, see ki u saan bann Rom.

²² Li paak ki u tun Timoti nan Erastus, u sommteeb ni bannlee, a bin gar u tɔɔnn po ki saan Masedonia, ŋaan ki u din biar Asia tiŋ ni.

²³ Li yoo maŋ daamuk bonbiir din fiir, kimaan ti Yomdaanɔ Yisa weiu paak.

²⁴ Ki jasɔɔ nna mun din be ki u sann yi Demetrius, ki u tuu jikit sarima ki din maa bi yennu nba ki bi yiu Diana na pochianfei li bonninana, ki li tee pata, ki u kɔi; ki din jii niib ki bi tuun u toona, ki bi laat likirii bonchiann.

²⁵ Ŋanne ki u tan yiimm ki taan bi kura, ki bia taan binba kur kur tuun li toonbooru na, ki tan betib a “N ninjamm, i mi nan ti nyɔɔt nyi ti toona na nie.

²⁶ I mɔŋ mɔŋ mun poŋ gbat ki bia la nan Pɔɔl nba yeen linba na. U yaa a nirɔ nba maa yennu nan u nii, a ŋann ki tee yennu kaa, ki u maan na tunn niib yan bonchiann Efesus nna, ki maan na bia jii nna ki saan per Asia tiŋ kura.

²⁷ Li pasiar ki ti toona na sann tan sa kpet mann biir, ki bia jenna, ki ti yabint yennu Diana pochianfeek tan sa kpet mann ki teen yann, ki bia jenna, ki ti yennu Diana nibaakir tan sa mann ki waab, daanɔ nba ki sɔɔ kur nba be Asia tiŋ ni nan tingbouŋ na kura jiantirɔ na.”

²⁸ Nibur na nba gbat nna yoonba, ki bi wutoa fiir, ki bi tian tintianii, ki yaa a “Timm Efesus teeb yennu Diana tee yabint yennue!”

²⁹ Ki doo na kur muk. Ki bi soor Gaius nan Aristakus ki chiar saan kɔɔ namm nitituk ni. Jab bannlee maŋ din tee Masedonia niib, binba ki Pɔɔl tuu tɔkii namm na.

³⁰ Ki Pɔɔl loon ki wun kɔɔ niib na ni, ŋaan ki Yisaweira ki sak a wun kɔɔ.

³¹ Ki doo na yudamm ni siab nba din tee Pɔɔl yɔɔsinba din tun toomii a Pɔɔl-n di sukuru, ki daa kɔɔ nitituk maŋ ni.

³² Li yoo na, nitituk maŋ ni, siab din tian tintianii, ki yakii kpayakit jiak jiak, ki niib nba tikir na yan ŋmat saa gar, kimaan bi bonchiann din ki bann bi lakinu maŋ paaki.

³³ Tɔn, ki Juu teeb nyinn jasɔɔ nba ki bi yiu Aleksander, ki sennɔ bi tɔɔnn, a wun pak bi paak ki turib. Ki Aleksander donn nuu sanpaapo, ŋaan ji loon wun pak tur nibur na ki nyinn Juu teeb mɔniɔk maŋ ni.

³⁴ Ŋaan ba tan bann nan u tee Juu nirɔ na, ki bi ji ki sak a wun paki, ŋaan tian tintianii, ki yeen a “Timm Efesus teeb yennu Diana tee yabint yennue.” Ki bi kur tian nna ki yukir bonchiann.

³⁵ Li joontu ki doo maŋ saakɔɔ te ki nibur na ŋmin, ŋaan ki u betib a “Yimm Efesus teeb, sɔɔ kaa tingbouŋ na ni ki ki mi nan Efesus teebe guu ki gorii yabint Diana pochianfeeki, ŋaan mun guu ki gorii tanŋann nba nyii sanpaapo ki tan baa na.

³⁶ Sɔɔ bia kaa ki sa fit nɔi linba na. Li paak, li ŋan ki yii di sukuru, ki daa tee jatii,

³⁷ kimaan i baar nan niib na nna na, ŋaan ki bi ki jan ti pata bonti. Bi bia ki piak ki sukii biir ti yennu.

³⁸ Li-i tee ki Demetrius nan u toontunleeb mɔk maan nan sɔɔie, ŋann buut boor poŋ be ki mɔk li daa, ki buut damm mun bia be. Ŋaant bin saan kii sii pootir bi leeb leŋ.

³⁹ Ŋaan li-i tee ki i mɔk barsai nba ki tee ki i saan nann buut boor maŋi, li ŋan ki yi saan i mɔŋ yudamm boor.

⁴⁰ “Li pasiar Rom teeb tan sa mann la ti biit, ki yet a ti tee doyeerdamme, ki jikit saa linba teen dinna na po, ki li ki mɔk paaki, ki ti mun bia kan fit wann li paak ki jikit saa daamuk na po.”

⁴¹ U yet nnee, ŋaan ji yat niib na.