Toona 15 - Yennu Gbounpaauŋ Mɔɔr

Toomiinba nan Yisaweira saakab lakinu labaar

¹ Li yoo na ki nisiab nna din nyii Judea ki sik Antiok, ki tan want Yisaweira na a “Li kpaa talase ki i pot i puna, kaman nan Moses sennu nba senn biaŋinba na. Ŋann-i kaa, i kan la tinnu.”

² Ki Pɔɔl nan Banabas nan ŋamm nɔi nan leeb bonchiann nan nunmɔnn, ki Yisaweira na tan dukin ki nyinn Pɔɔl nan Banabas nan bi ni siab, a bin saan Jerusalem, ki saa la toomiinba na nan Yisaweira saakab, maan maŋ po.

³ Tɔn, ki Yisaweira na turib sɔnu, ki bi saa ki saa gaar Fonisia nan Samaria yaka po, ŋaan bet Yisaweira nba be leŋ na a binba ki tee Juu teeb na siab lebit bi binbeŋ ki teen Yisaweira. Ki labaar maŋ din turib parpeenn ki saa yakir.

⁴ Ba baar Jerusalem yoonba, ki Yisaweira nan bi saakab nan toomiinba na din gaarib saantuk. Ŋanne ki Pɔɔl nan Banabas betib linba kur ki Yennu tun namm.

⁵ Ŋaan ki Yisaweira na siab nba tee Farisiinba na fiir set, ki yet a “Li kpaa talase ki boorganu na-n pot bi puna, ŋaan bia dia Moses sennu.”

⁶ Li paak ki toomiinba nan saakab na lakin leeb, a bin dukin maan maŋ po.

⁷ Ŋanne ki bi din pak yukir nan leeb, ki Piita tan fiir ki yet a “N naa waas, i mi nan yoo nba din gar na, Yennu din gannin a n wann Yisa barŋanii na ki tur boorganu, ki bin fit lian gbat ki teen Yisa yada ki teen u weira.

⁸ Ki Yennu nba mi nisaarik par ni na, ŋɔɔe din tur boorganu u Seyeeŋ kaman nan wa kpan din turit na, ki li wann nan boorganu nba teen yada nee, ki u gaarib.

⁹ U ki mɔk lukitimi, kimaan ba teen Yisa yada na paak, ki u nyik bi biit ki chabib kaman nan wa din nyik chab timm na.

¹⁰ Li paak, bee ki i loon ki i bikin Yennu? Bee ki i loon ki i te ki boorganu nba tee Yisaweira na-n dia sennu nba ki timm nan ti yejamm din ki fit dia gbaa?

¹¹ Ti daa tee nna. Timm nan ŋamm jame; ti kur teen ti Yomdaanɔ Yisa yada ki la tinnu u ninbatinu paake.”

¹² Ŋanne ki Yisaweira na kura din ŋmin, ŋaan ji gbiintir Banabas nan Pɔɔl. Ki bi beerib bakitnauŋ toonjaana nba ki Yennu din tun namm ki tur boorganu na.

¹³ Ba betib gbenn yoonba, ki Jems yetib a “N naa waas, gbiintirin man,

¹⁴ Simon betit biaŋinba ki Yennu sint tin boorganu ninbatinu, ki nyinn niib bi ni a bii tee u mɔŋ niib.

¹⁵ Ki Yennu sɔkiniinba mɔmaan mun bia din pak nnee, kimaan li sɔb Yennu gbouŋ ni a

¹⁶ ‘Li poorpo, min, i Yomdaanɔ Yennu sa jen, ŋaan David yaaboona nba lek ki dia u naan na, see ki n gbenn dinn u yaaboonyenɔ, ki ŋamm naan maŋ,

¹⁷ a ki li paak, nisiab kur nba be tingbouŋ na ni ki ki tee Israel teebi, ŋaan ki n gannib na a bin nakin min nba tee bi Yomdaanɔ.

¹⁸ Nnee ki ti Yomdaanɔ Yennu din yet, ŋɔɔ wunba te ki bi bann linba na yaayoo niwa.’ ”

¹⁹ Ki Jems bia yet ki pukin a “Li teen n dudukit ni nan ti daa jikit linba paar ki teen boorganu na nba lebit ki waa Yennu sɔnu na paaki.

²⁰ Ki la sii tee biaŋinba, li ŋan ki tin sɔb gbouŋo, ki betib ki bi daa di linba ki bi poŋ mann pata, ŋaan betib ki bii so bi mɔŋ nan bonchonchonn toona, ki bia daa ŋman bonkobuk nba ki bi ŋmakir kpii, ki bia daa di sɔmi.

²¹ Moses sennu ŋarin, binba mɔɔntir sennu maŋe be, kimaan yaayoo niewa ki tan tuu dinna, bi poŋ tuu karin u sennu gbouŋ ni, Yenjiantu diit ni, foon daa kura.”

Ba sɔb gbouŋ ki tur boorganu na biaŋinba

²² Ŋanne ki toomiinba maŋ nan saakab na nan Yisaweira na kura dukin ki nyinn nisiab bi ni, a bin tun ŋamm nan Pɔɔl nan Banabas a bin saan Antiok. Ŋamme din tee Judas, wunba sann din yi Basabas na, nan Sailas. Bi jab bannlee maŋ din tee Yisaweira yudamm na yemme.

²³ Ki bi din yaa bin tumm nan gbouŋ, ki sɔb a “Timm Yisa toomiinba nan Yisaweira saakab sɔbin gbouŋ na ki foont yimm ti naa waas binba ki tee Juu teeb ki be Antiok nan Siria nan Silisia.

²⁴ Ti gbat ki ti nisiab baar i peŋ, a ki piaki barsai ki li daamii-i ki ŋmat i yan, ŋaan ti mun ki wannib siar, a bin tan teen nna,

²⁵ ki li paake te ki ti taan leeb ki soor ki gann Judas nan Sailas, ki tuumm i boor nna, ki ŋamm nan ti naa walonkai Pɔɔl nan Banabase saa,

²⁶ binba jii bi saaŋmanii ki likin ti Yomdaanɔ Yisa Masia toona ni na.

²⁷ Judas nan Sailas bia sa saa beti li biaŋ biak, linba ki ti sɔb maŋ.

²⁸ Yennu Seyeeŋ nan timm kur dukin nan li ŋan ki ti te ki i dia sennu nba kpaa talase, ŋaan daa pukii linba paari.

²⁹ Ya sii tuun linba maŋe na: I daa di jeet nba ki bi mann pata. I bia daa di sɔmi. I biakii mi ki i ŋman bonkobuk nba ki bi ŋmakir kpii, ŋaan kii so i mɔŋ nan bonchonchonn toona. Li-i tee ki i dia i mɔŋ nna, li sii ŋan i po. Li kurii na.”

³⁰ Ŋanne ki bi tumm, ki bi sik Antiok, ki saa lakin taan Yisaweira na kura, ki turib gbouŋ na.

³¹ Niib na nba karin gbouŋ maŋ yoonba, ki bi la parpeenn nan bi kpaanii maŋ paak.

³² Ki Judas nan Sailas, binba din tee sɔkiniinba na, din yukir namm ki betib Yennu maan bonchiann ki cheen Yisaweira maŋ para ki totib.

³³ Bi yukiru maŋ poorpoe, ki Yisaweira na chabib, ŋaan yetib a “Yennu-n turi taaŋann.” Ki bi ŋmat kun binba tumm na boor ni.

³⁴ (Ŋaan Sailas ŋarin din dukin a wun biar Antioko.)

³⁵ Ki Pɔɔl nan Banabas mun bia din yukir Antiok. Ki ŋamm nan leeb bonchiann din mɔɔntir ti Yomdaanɔ maan ki teen niib ki bia wantib li paak.

Pɔɔl nan Banabas bɔkitu labaar

³⁶ Li din yann waan ki Pɔɔl yet Banabas a “Ŋaant ki tin ŋmat ki saan gɔn ti naa waas nba be digbana kur nba ki ti din saan ki saa mɔɔnt ti Yomdaanɔ maan na, ki laan ba be biaŋinba.”

³⁷ Ki Banabas loon bin jii Jɔɔnn Mak,

³⁸ ŋaan Pɔɔl din ki sak a bin jiiu, kimaan u din tan ki joont namm bi toona na ni, ŋaan din nyikib Pamfilia, ŋaan ŋmat kun.

³⁹ Ki mɔniɔk din fiir Pɔɔl nan Banabas sinsuuk ni, ki bi bɔkit leeb. Ki Banabas din jii Mak, ki bi kɔɔ ŋaruŋ ki saan Saiprus.

⁴⁰ Ki Pɔɔl mun din gann Sailas, Yisaweira na ni. Ki Yisaweira na din jiib ki kubimm Yennu nuu ni, a wun sommib.

⁴¹ Ki bi din saan, ki saa gar Siria nan Silisia yaka po. Ki Pɔɔl din piak ki cheen Yisaweira para doi na ni.