Toona 13 - Yennu Gbounpaauŋ Mɔɔr

Biaŋinba ki Yennu Seyeeŋ gann Banabas nan Sɔɔl

¹ Antioko ki Yennu sɔkiniinba siab nan wanntesiab din be Yisaweira na ni. Ŋamme din tee Banabas nan Simeon (wunba ki bi din yiu Jabɔŋ na), nan Lusius, wunba din nyii Sairene na, nan Manaen (bi din lakin wubii Manaen nan Bat Herod bi bisin ni), nan Sɔɔl.

² Ki dasiar ki bi daa din be ki jiantir ti Yomdaanɔ ki lorin mɔi, ki Yennu Seyeeŋ tan betib a “Nyint Banabas nan Sɔɔl, ki bin tun toonn nba ki n yiimm a bin tun na.” Ki bi nyimm.

³ Li poorpo ki bi bia lor mɔi ki miar Yennu, ki yii nii bi paak ŋaan chabib.

Saiprus tiŋ labaar

⁴ Yoo nba ki Yennu Seyeeŋ din tun Banabas nan Sɔɔl a bin saan tun u toonn na, ki bi din sik Selusia ki kɔɔ ŋaruŋ, ki saa baar Salamis nba din be Saiprus tiŋ ni na,

⁵ ki nyii ŋaruŋ ni leŋ, ki saa Juu teeb Yenjiantu diit ni, ki mɔɔntir Yennu maan ki teemm. Ki Jɔɔnn Mak din tee bi kpaakir ki be namm.

⁶ Li poorpoe ki bi din nyii Salamis, ki gaar tiŋ maŋ doi kur ni, ki saa baar Pafos. Leŋe ki bi din la nyɔkluursɔɔ, ki u sann yi Bajiisus, ki u din tee Juu nirɔ nba kpann a u tee Yennu sɔkinii.

⁷ U din be Saiprus tiŋ ni yudaanɔ boore; ki yudaanɔ maŋ sann din yi Sejius Pɔɔlus; ki u din tee yandaanɔe, ki din yiin Banabas nan Sɔɔl a bin tan pak Yennu maan ki wun gbat.

⁸ Ŋaan ki nyɔkluurɔ maŋ, wunba sann din yi Elimas, Griik maan ni na, ki u ki sakibi, ŋaan koor a wun tia yudaanɔ maŋ ki u daa tee Yisa yada.

⁹ Ŋanne ki Yennu Seyeeŋ fiir Sɔɔl ni, wunba sann mun din yi Pɔɔl na, ki u got nyɔkluurɔ na sirrr,

¹⁰ ki tan yetɔ a “Fin, nibiiuk daanɔ nba gbee nan kpinkpannii na! Fine tee Sintaanii bik, ki bia tee toonŋana kur dataak. Fin ŋarin, yoo kur a jikit Yennu barmɔnii ki kpintir faake.

¹¹ Tɔn, Yennu nuu sa paa-a ki a jɔɔn ki kan la yentu ki lin yanna.” Li taakpaak ni, ki wunn nba bɔn baa u ninbina ni, ki u ji somm ki turin, ki loon sɔɔ-n datɔ.

¹² Ki yudaanɔ na nba la linba teen na, ki u teen Yisaweirɔ, kimaan u yan din kɔɔ nan linba ki u ji bann ki jikit saa ti Yomdaanɔ po na.

Antiok nba be Pisidia tiŋ ni labaar

¹³ Li poorpoe jik ki Pɔɔl nan u weinanleeb kɔɔ ŋaruŋ, ki nyii Pafos ki saan Pega nba din be Pamfilia tiŋ ni na. Leŋe ki Jɔɔnn Mak din nyikib ŋaan ŋmat saan Jerusalem.

¹⁴ Ki bi saa tɔɔt ki nyii Pega, ki baar Antiok nba din be Pisidia tiŋ ni na. Ki foon daar ki bi saan kɔɔ Yenjiantu diiuk ni ki kar,

¹⁵ ki la ki bi karin Moses sennu ni nan Yennu sɔkiniinba sɔbu ni, ki Yenjiantu diiuk maŋ ni saakab yetib a bin yet Pɔɔl nan Banabas a “Ti naa waas, li-i tee ki i mɔk labaŋann nbaie ki sa pak ki turit, yin pak.”

¹⁶ Ki Pɔɔl fiir ki set ki donn nuu ŋaan piin paku, ki yaa a “Yimm Israel teeb nan yimm nba kur be ki jiantir Yennu na, gbiintir man,

¹⁷ timm Israel teeb, Yennu din gann ti yejamm ki te ki bi yabit bonchiann, yoo nba ki bi daa din tee saamm ki be Ijipt tiŋ nna; ki ŋɔɔ Yennu din jii u paŋ ki nyinnib leŋ.

¹⁸ Ki ba din be muuk ni binpiinna ki ki saak u mɔb na, ki u lek soor u yan namm.

¹⁹ Ŋaan li poorpo ki u biir nibooru munnlore nba din be Kenann tiŋ nna, ŋaan te ki u mɔŋ niib Israel teeb yent tiŋ maŋ.

²⁰ Ki linba na kur din tun bina kobiinna nan piiŋŋmu sinsuuk ni. “Yoo nba ki bi din yent tiŋ maŋ na, ki u din turib yudamm a bii bu bi maan daann nan yoonba ki Yennu sɔkinii Samuel tan sa baar.

²¹ Ki li poorpo, bi bia din tan boi Yennu a wun turib bat. Ŋanne ki Yennu din gann Sɔɔl ki turib a wuu tee bi bat. Ŋɔɔ din tee Kish bijae, Benjamin booru ni nirɔ, ki u din dii naan maŋ bina piinna.

²² Ki Yennu din tan liatɔ u naan ni, ŋaan dinn David a wuu tee bi bat jik. Nnee ki Yennu din pak David po a ‘N bann nan David, wunba tee Jese bik na, mantik gboot n numm, kimaan u sa tun linba kur ki n loon na.’

²³ “Jɔɔ na yaaboona nie, ki Yennu din nyinn ti Tinntɔɔ Yisa, ki teenɔ Israel niib ni, kaman nan wa din senn mɔsonn biaŋinba na.

²⁴ Ŋaan Jɔɔnne din dɔŋ baaru ki din mɔɔntir teen Israel teeb kura a bin nyik bi biit, ki wun wurib Yennu nyunwuru.

²⁵ U toonn nba ji din tan gbent na, ki u boib a ‘I dukii mi a n tee ŋmee? N ki tee Yennu Niganntɔɔ Masia na kaa. Gotir man, ŋɔɔe yaa wun tan baar n poorpo, ki n kii ŋan nan ki n pit u taasaati.’ ”

²⁶ Ŋanne ki Pɔɔl bia yaa a “N naa waas, a yimm nba tee Abraham yaaboona, nan i kur nba be nna ki jiantir Yennu na, maan nba ki Yennu turit ki li want tinnu maŋ po na, li tee ti yare.

²⁷ Niib na nba din be Jerusalem, nan bi yudamm na, bi din ki mi nan nirɔ nee tee Yennu Niganntɔɔ, ki bia ki bann Yennu sɔkiniinba maan nba ki bi tuu karin foon daar kur na paaki; ŋaan ba din pak biirɔ na, bi din gbeen Yennu sɔkiniinba mɔi maŋa.

²⁸ Bi din ki la u bisiat nba tee linba paak ki bi yaa bin kpiu, ŋaan lek bia yaa a Pailat-n kpiu.

²⁹ Ba din teen Yisa linba kur gbenn kaman nan Yennu gbouŋ nba din want biaŋinba na, li yoo ki bi kpaatɔ dapunpunn na paak, ki sikinɔ ki piiu kaauk ni;

³⁰ ŋaan ki Yennu fiinɔ kuun ni.

³¹ Ki binba din tuu tɔkii nanɔ ki nyi Galilee ki lin teee ki tan gbenn ki baar Jerusalem na, ji din laatɔ daa bonchiann, wa din fiir na. Li paak ki bi ji tee u siara damm mɔtana ki teen niib.

^32-33 “Ŋanne te ki ti baar i peŋ na a tin wanni Yennu barŋanii. Tɔn, Yennu nba din senn ti yejamm mɔsonn na, u ji gbeen ki tur timm nba tee bi yaaboona nawa, nan wa din fiin Yisa u kuun ni na. Nnee ki li sɔb Yennu gbouŋ ni, yanii nba tee munnlee na yanii gbouŋ nɔɔk ni, a ŋɔɔ Yennu yetɔ a ‘Fine tee n Bija, ki dinne ki n sa wann niib nan n set tee a Baa.’

³⁴ Ki bia jenna, Yennu din yet a u sa fiin Yisa kuun ni, a u ji daa mi ki kpenni, ŋaan yetɔ a ‘Mɔsona nba ki n mɔŋ mɔŋ din senn, ki yaa a n sa tur David na, see ki n set gbenn tura, fin nba tee u yaaboonn na.’

³⁵ Ki bia jenna, gbouŋ na siarpo, David din yet Yennu a ‘A kan sak ki a Popeendaanɔ gbanant-n kpakin kaauk ni ki bati.’

³⁶ Tɔn, David din tun linba ki Yennu wannɔ ki gbenn; li poorpoe ki u din tan kpo, ki bi piiu u yejamm kakura ni, ki u gbanant bat.

³⁷ Ŋaan Yennu nba din fiin Yisa kuun ni na, ŋɔɔ yaa gbanant ki bat kaauk ni.

^38-39 “N naa waas, li paak, i kura-n bann nan li set tee barmɔniie ki n beeri, li-i tee ki i teen Yisa yada, u paake ki Yennu sa nyik ki chab i biit. N beerie nan daanɔ nba kur teen Yisa yada, ŋɔɔ wur nyii u biit niwa; ŋaan Moses yaa sennu na ŋarin, nirɔ kan fit wur nyi u biit ni.

⁴⁰ “Li paak, soot i mɔŋ man, ki daa te ki Yennu sɔkiniinba nba din yet linba na ki lin tan diinii. Nnee ki Yennu din yet a

⁴¹ ‘Gotir man, yimm garuk damm na, ŋaant ki lin bakiti; toona nba ki n tuun i yoo na gbaa, sɔɔ-i lekii baar ki beti li po, li tee linba ki i kan mi ki teen yadaie. Li paak, see ki i kpo.’ ”

⁴² Ba gbenn lakinu yoonba, ki Pɔɔl nan Banabas din nyii Yenjiantu diiuk na ni, ki niib na barimm a bi-i ŋmat kun, ŋaan bin teen paaru ki daan jen foon daar nba baat na, ki tan wannib labaar maŋ biak.

⁴³ Ki Juu teeb bonchiann, nan boorganu bonchiann, binba din lebit bi jiantu ki waa Juu teeb jiantu na, ki bi kura ji din waa Pɔɔl nan Banabas. Ki bi piak namm ki kpaamm a “I kpaŋŋii dia nna man, kii waa Yennu ki yabir la Yennu ninbatinu.”

⁴⁴ Ki foon daleer nba din tan baar, li din biar waaminnee nan doo na ni sɔɔ kur-n lakin ki gbat Yennu maan.

⁴⁵ Juu teeb nba din la nigbouŋ tikii na, ki bi fiin punpona, ki piak biir Pɔɔl wannu, ki bia sukiiɔ.

⁴⁶ Ŋaan ki Pɔɔl nan Banabas lek bia yeen nan parcheenn a “Li kpaa talase nan ki tin sint pak Yennu maan ki tur yimm Juu teeb. Ŋaan ya yêt maan maŋ, ki bia dukin nan i ki ŋan nan i la manfoor nba kaa gbennu na, li paake te ki ti nyikiti, ŋaan saa binba ki tee Juu teeb ni na,

⁴⁷ kimaan ti Yomdaanɔ Yennu turit mɔb a nna, kimaan li sɔb u gbouŋ ni a u din yet Yisa Masia a ‘Mine ganna a fii tee yentu, kii yentir kii teen binba ki tee Juu teebi, kii bia baat nan tinnu kii teen tingbouŋ na teeb kur.’ ”

⁴⁸ Tɔn, binba ki tee Juu teeb maŋ nba din gbat nna maŋ, ki bi ji mɔk parpeenn, ki piak Yennu maan. Ki binba ki Yennu gannib a bin la manfoor nba kaa gbennu na teen Yisa Masia yada.

⁴⁹ Ki ti Yomdaanɔ maan maŋ yat tiŋ na lokir kur po.

⁵⁰ Li yoo na ki Juu teeb na din fiin Antiok na yudamm, nan poojaana nba din tee yentina, wutoa, ki bi jak Pɔɔl nan Banabas muksuk, ki berib nyinnib bi yent ni.

⁵¹ Ki toomiinba na din yet a “Ti nii nan ti taai na,” ŋaan yaat saan Ikonium.

⁵² Ki Yisaweira nba din biar Antiok na mantik din gbee nan Yennu Seyeeŋ nan parpeenn.