Toona 12 - Yennu Gbounpaauŋ Mɔɔr

Piita nba kɔɔ dansarik biaŋinba

¹ Li yoo na dinn ki batsaakɔɔ Herod din jak Yisaweira siab nan muksuk,

² ki din te ki bi kpii Jɔɔnn yɔɔrɔ Jems nan jukbanjiak;

³ ki li penn Juu teeb na para. Bat Herod nba bann nan wa teen biaŋinba ki bi para penn na, ki u bia lek ŋammit ki tee nna, ki tan soor Piita, yosau nba ki bi din mɔk jaamm ki di boroboro nba kaa datiŋ na.

⁴ Wa soor Piita yoonba ki u kɔɔnɔ dansarik, ki turɔ dansarguura. Bi din tee paabu munnae ki guu-u, ki paabyenn kur ni guura bannae guu-u; ki Herod din dukii a jaamm maŋ poorpoewa, ki u sa nyinn Piita, ki Juu teeb-n bu u buut ŋaan kpiu.

⁵ Ki Piita daa be dansarik ni, ŋaan ki Yisaweira paa Yenmiaru paak u po nan nunmɔnn.

Biaŋinba ki malaka nyinn Piita dansarik ni

⁶ Tɔn, ki Herod din dukii nan li-i yent sanyiɔk u sa nyinn Piita ki kpiu; ki li daar nyiɔk maŋ ki Piita lor nan jarit ŋannlee, ki gɔɔnt guura bannlee na sinsuuk ni, ki guura maŋ siab mun din guu dansarik diiuk na tammɔb.

⁷ Li taakpaak ni ki ti Yomdaanɔ malaka dɔkit, ki yentu yent dansarik diiuk na ni, ki u nik nik Piita bɔpiɔk ki muntɔ, ŋaan yetɔ a “Fiit yian yian!” Ki u fiir. Wa fiir yoonba, ki jarit na pit u nii ni ki baa.

⁸ Ki malaka na yetɔ, “Lian a tiat, ki pir a taasaat.” Ki Piita teen nna. Ki u bia betɔ a “Gbabin a chinchenn kii waan.”

⁹ Ki u gbab ki waau; ki bi nyii dansarik diiuk na ni, ŋaan Piita din ki bann nan malaka nba tuun biaŋinba maŋ, li tee mɔniie. U din mi a u laat yerintue.

¹⁰ Ki bi din baar gar sinsinn guurɔ na boor ni, ki bia tan baar gar leeb na boor, ki ji saa baar kutganjoontik na ni. Ki gann maŋ loot li tiauŋ ki turib. Ki bi nyii nanyer, ki tɔkin sɔnu ki saa, ki malaka na taan lir bot ŋaan nyikɔ.

¹¹ Ŋanne ki Piita ji yerint bann, ki yet a “Mɔtanae ki n ji daa bann nan li set tee mɔniie nan Yennu tun u malaka ki u baar nyinnin Bat Herod nuu ni, ki bia nyinnin nan Juu teeb nba dukii a bin tumin biaŋinba na ni.”

¹² Wa bann u mɔŋ po nba tee biaŋinba, ki u saan Jɔɔnn Mak naa Mari ŋaak ni; ki niib bonchiann poŋ tikir leŋ ki mei Yennu.

¹³ Ki Piita kpaa kpaa nanyer po gann, ki sapaantoontunnɔ, wunba sann yi Roda na, baar gann maŋ peŋ a wun gbiint,

¹⁴ ki ji bann Piita kunkɔr, ki chiar ŋmat nan parpeenn niib na ni, ŋaan taan ji ki loot gann na, ki yetib a “Piita be nanyer po.”

¹⁵ Ki bi betɔ a “Waatuko mɔka.” Ŋaan ki u bia ŋammit lek yeen a u be; ki bi yaa a “Li tee u malakae.”

¹⁶ Ki Piita bia lek see ki kpaan gann na; ki bi tan loot gann maŋ ki lau, ki li ji yaar ŋaan litib.

¹⁷ Ki u donn nuu a bin ŋmin, ŋaan wannib biaŋinba ki ti Yomdaanɔ nyinnɔ dansarik ni; ki u betib a “I saa man, ki saa bet Jems nan Yisaweira leeb linba na po.” Li poorpo ki u nyikib ŋaan yaat saan siar po.

¹⁸ Ŋanne ki li yent sanyiɔk, ki mukir muk dansarguura na paak, ki li ki jerimi, kimaan bi ki mi Piita nba ji be siami.

¹⁹ Ki Bat Herod tur mɔb a bin lon u boor, ki bi lomɔ ki ki lau; ki u boi guura maŋ buboit, ŋaan tur mɔb a bin kpib. Li poorpoe ki Bat Herod din nyii Judea ki sik Siisarea, ki yann leŋ waama.

Herod na kuun po

²⁰ Ŋanne ki li din biir Bat Herod par ni bonchiann Taya nan Saidon teeb paak. Bi din tuu laat jeet Bat Herod yent ni; li paak, ki bi lakin leeb a bin saan lau. Sinsinn ba baar ki la Blastus, wunba tee Bat Herod karachi-saakɔɔ na, ki bi marik bi mɔb ki maŋ nanɔ, ki bi tan saan Bat Herod boor ni ki saa diiu sindant.

²¹ Ŋanne ki Bat Herod din tan senn daar, ki tan lia u kpanbar liatgbeŋŋa, ki nyii kar u naangbouŋ paak, ŋaan pak tur niib na, ki niib na wuus a

²² “Nirɔ kunkɔr kaa na. U tee yensɔɔe.”

²³ Li taakpaak ni ki ti Yomdaanɔ Yennu malaka te ki yiarbiiuk baa u paak, kimaan u din ki teen Yennu dontir maŋi; ki nanwuba kɔɔ mɔɔu ki u kpo.

²⁴ Li yoo maŋe ki Yennu maan ŋammit yat ki kɔɔ niib ni.

²⁵ Yoo nba ki Banabas nan Sɔɔl din gbenn bi toona nba ki bi saan ki tun na, ki bi ji jii Jɔɔnn Mak ki nyii Jerusalem ki ŋmat ki kun Antiok.