Taitus 3 - Yennu Gbounpaauŋ Mɔɔr

Masiaweira binbeŋ labaar

¹ A tiarib ki bin tur bi tiŋ yudamm nan yentdamm nibaakir, ki sak bi mɔi, ki teen siir ki tun toonŋana kura.

² Betirib ki bi daa piak barbiit sɔɔ paaki, ki daa kɔn nan leebi, kii be soonna, ki tur sɔɔ kur nibaakir;

³ kimaan sianyoo ti mɔŋ din ki mɔk yami, ti din tee mɔyêtdamme, ki waa sɔnu nba ki tooki, ki waa nianbiit sɔnbooru booru. Ti din tuu ki mi dudukit nba ŋan; ti din tee funfunn damme, ki din nan ti leebe ki bi mun namit.

⁴ Ŋaan ti Tinntɔɔ Yennu loomm nan u burchint nba din tan fiit nyii paanu yoonba,

⁵ ki u din tinnit. Li din ki tee ti tiauŋ toonŋana paak kaa, ŋaan u mɔŋ ninbatinu paake ki u din tinnit, ki din wurit ki nyinn ti biit, ki te ki u Seyeeŋ ŋamm nant, ki turit manfopaann,

⁶ ki din jii u Seyeeŋ maŋ ki turit bonchiann, ti Tinntɔɔ Yisa Masia paak.

⁷ Yennu ninbatinu paak ki u din tun nna a wun teent niŋamm u boor; ki bia teent u waas nba mɔk dindann ki ti sa la manfoor nba kaa gbennu.

⁸ Barii na tee barmɔniie. N loon ki a jii a dudukit kur kii wantib linba na, ki binba teen Yennu yada na-n jii bi yoo ki tun linba ŋan; ŋanne ŋan ki mɔk nyɔɔt ki tur sɔɔ kura.

⁹ Ŋaan nyik mɔnɔyanna, nan yejamm ni yaadindɔuŋ kannu, ki daa kɔn nan leeb, ki bia daa nɔi mɔniɔk sennu paak, kimaan linba na kura ki ŋan, ki ki mɔk nyɔsiati.

¹⁰ Nirɔ-i tee tukinadaanɔ, a kpaanɔ munnlee amii munntaa; ki u baka-i kaa li kpaanii ni, fan nyikɔ ki daa fiin u po,

¹¹ kimaan a mi nan li nibooru nyik Masia weiuwa, ki u toonbiit nee want u mɔŋ biit.

Kpaanii nba joont

¹² Mi-i tun Atemas amii Tikikus a boor ni yoonba, fan yabir ki chetin Nikopolis doo ni na, kimaan n sii be leŋe gbintankaaŋ yoo.

¹³ Yabit a mɔŋ ki somm Senas, wunba tee barbuurɔ na, nan Apolos, ki bin la ba loon linba kur ki piin bi somma na.

¹⁴ Li kpaa talas ki Masiaweira-ii tuun toonŋana kii sommit niib bi fara ni, ki daa be binbeŋ nba kaa nyɔɔti.

¹⁵ Binba be n boor ni na kura foonta. A foont binba teen Masia yada ki loonit na. Yennu-n somm i kura.