Taitus 2 - Yennu Gbounpaauŋ Mɔɔr

Wannmɔnu labaar

¹ Ŋaan fin-ii want linba tee wannmɔnu.

² A kpaan jasaakab ki bii be soonna, kii sub, kii dia bi mɔŋ, kii dia Masia labaar fanu, kii loon niib, kii mɔk gbankur.

³ A bia kpaan poosaakab ki bii tee popeendamm. Bi daa tee sanjanjanna, ki daa nyu daan ki yibi. Li kpaa talas ki bii want linba ŋan,

⁴ kii want poobis na ki bii loon bi sɔrib nan bi waas,

⁵ kii dia bi mɔŋ, kii tee popeendamm, kii tee ŋaapooŋamm, kii be fanu, kii saak bi sɔrib mɔi. Ŋanne sa te ki sɔɔ kan fit pak bonbiir ki jikit saa Yennu labaar po.

⁶ A bia kpaan naasimm ki bin dia bi mɔŋ.

⁷ A mɔŋ-ii be fanu bonsiar kur ni, kii want leeb ba sii be fanu biaŋinba. A wann niib Masia labaar nan barmɔnii, kii sub.

⁸ I piak mɔmɔmm nba ki sɔɔ kan mi yiinir yanni, ki binba loon ki bii kɔn nant daa laat bonbiir nba ki bi sa pak ti po; ŋanne ki bi sa di fei li paak.

⁹ Li ŋan ki daaba-ii saak bi yomdamm mɔi, kii pent bi para bonsiar kur ni. Bi daa nɔi nan bi yomdamm mɔniati,

¹⁰ ki daa jaan bi siari. Ŋaan li kpaa talas ki bin wann bi mɔŋ nan bi be fanu nan barmɔnii yoo kura; ŋanne ki bi binbeŋ kur sa wann nan ti Tinntɔɔ Yennu wannue ŋan bonchiann.

¹¹ Kimaan Yennu tur nisaarik kur sɔnu a bin la tinnu; ŋanne fiit wann u ninbatinu nba yab biaŋinba.

¹² Li ninbatinue wannit a tin nyik linba kur ki tee yentinu na, nan tingbouŋ na loonbiit, ŋaan dia ti mɔŋ, kii be fanu, kii tiin Yennu tingbouŋ na ni,

¹³ kimaan ti guu ki mɔk dindann nba turit parpeenn nan ti yabint Yennu nan ti Tinntɔɔ Yisa Masia sa dɔkit nan yentsaakar ni;

¹⁴ ŋɔɔe din gaar ti paak ki kpo a wun nyinnit biit kur daabsin ni, ki te ki ti tee popeendamm nba tee u kuukɔɔ yab, kii teen niib nba numm mɔn nan toonŋana tumu.

¹⁵ Wantib linba na kura, kii cheen bi para, kii kpaanib Yennu nba tura yudant biaŋinba na; sɔɔ daa goriia yanni.