Taitus 1 - Yennu Gbounpaauŋ Mɔɔr

¹ Min Pɔɔl, wunba tee Yennu daabir nan Yisa Masia toomii na, mine ki Yennu gannin ki tumin u nigannkab boor a n chee bi yada, ki te bin bann u barmɔnii labaar nba wantit yentinu sɔnu.

² N mɔk dindann nan n sii mɔk manfoor nba kaa gbennu. Yennu nba ki mi fa faak na din senn mɔsonn yaayoo niwa a u sa turit manfoor maŋ,

³ ki yoo nba din tan jaŋ na ki u fiit wann li labaar u maan ni; ki u din jii labaar maŋ ki teen n nuu ni, ki n mɔɔntir kaman nan ti Tinntɔɔ Yennu nba turin mɔb na.

⁴ N sɔbin gbouŋ na ki teen fin Taitus wunba tee n bimɔŋ ki ti taa yada yennkɔɔ na. Ti Baa Yennu nan ti Tinntɔɔ Yisa Masia-n somma, ki bia tura parmaasir.

Taitus toona po

⁵ N din te ki a biar Kreet tiŋ ni ma a ŋamm bonsiar kur nba kpaa talase, ki bia gann Masiaweira saakab doo kur ni kaman nan ma din wanna biaŋinba na;

⁶ li kpaa talas ki Masiaweira saakɔɔ daa mɔk biiti; li kpaa talas ki u mɔk poo yenɔkɔɔ; li kpaa talas ki u waas-n teen Masia yada, bi daa tee waabiit nan tubkangbata;

⁷ kimaan Masiaweira yudaanɔ yen Yennu toona; li paak, li kpaa talas ki u daa mɔk biiti; u daa tee bongann, amii wunba dont wutoor yann yanni, amii wunba nyu daan ki yibi, amii wunba loon kunkɔna, amii wunba mantik mɔk likilonchiauŋi.

⁸ Li kpaa talas ki wuu mi saamm gaaru, kii loon toonŋana tumu, kii sub, kii be fanu, kii tee popeendaanɔ, kii mi mɔŋdianu.

⁹ Li kpaa talas ki u dia barmɔnii labaar nba ki ti din wanni na. Ŋanne sa te wun fit wann niib wannu nba took, ki fit nyann binba ki saak barmɔnii wannu maŋ.

¹⁰ N beera linba na, kimaan mɔyêtdamm be bonchiann, ki Juu tesiab mantik teen nnee, ki dia bi mɔmaan nba kaa nyɔɔt ki kpann bi leeb na.

¹¹ Li kpaa talas ki fin gɔɔr bi barii, kimaan bi likilonbiiuk paak ki bi lin want niib linba ki ŋan nan bii want, ki ŋmat ŋasai niib kur dudukit.

^12-13 Kreet jasɔɔ, wunba din tee bi tiauŋ sɔkinii din yet a “Kreet teeb fa faak yoo kura; bi naan nan bonkobibiit, ki bia tee forinfoona nba loon diina kuukɔɔ.” Wa din yet biaŋinba na, li tee barmɔniie. Li paak, li kpaa talas ki a yakii namm fanu, ki bin dia Masia labaar nan barmɔnii,

¹⁴ ki ji daa gbiintir Juu teeb faak labaar, ki bia daa gbiintir niib nba ki saak barmɔnii labaar na sennii.

¹⁵ Popeendamm boor ni, bonsiar kur yeene; ŋaan biitdamm nba ki teen Masia yada na, bonsiar ki yeen bi boori, kimaan bi dudukit nan bi yan ni ki yeeni.

¹⁶ Bi yi bi mɔŋ Yenmiirae, ŋaan ki bi toona want nan bi ki sak bann Yennu. Bi tee mɔyêtdamme, ki ki pent Yennu par ni, ki kan fit tun toonŋansiari.